އިންޑިއާއަކީ ކޮންމެ ވަގުތެއްގައި ވެސް ބަރޯސާވެވޭނެ ގައުމެއް: ޝާހިދު
އިންޑިއާއަކީ ރާއްޖެއިން ކޮންމެ ވަގުތެއްގައި ވެސް ބަރޯސާވެވޭނެ ފަދަ ގައުމެއް ކަމަށް ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެއެވެ.
މިނިސްޓަރ ޝާހިދު މިފަދައިން ވިދާޅުވީ އިންޑިއާއިން ރާއްޖެއަށް ކަނޑައަޅުއްވައިފައި ހުންނަވާ ސަފީރު މުނޫ މަހާވަރު، އެމަނިކުފާނުގެ އަރިހަށް މިއަދު ކުރެއްވި އިހްތިރާމްގެ ޒިޔާރަތުގައި ދެއްކެވި ވާހަކަފުޅުގައެވެ.
ފޮރިން މިނިސްޓްރީގައި ބޭއްވި މި ބައްދަލުކުރެއްވުމުގައި މިނިސްޓަރ ޝާހިދު ވަނީ ސަފީރަށް މަރުޙަބާ ވިދާޅުވެ، ދެ ޤައުމުގެ ޒަމާންވީ ގުޅުން އިތުރަށް ބަދަހިކުރުމާ ގުޅޭގޮތުން ޚިޔާލު ބަދަލުކުރައްވައިފައެވެ. މީގެ އިތުރުން މިނިސްޓަރ ޝާހިދާއި، ހައިކޮމިޝަނަރ މަހާވަރު ވަނީ އިންޑިއާގެ އެހީގައި ކުރިއަށްގެންދާ ތަރައްޤީގެ މަޝްރޫޢުތަކާއި، ރާއްޖެއާއި އިންޑިއާއާ ދެމެދު ގުޅުން ބަދަހިކުރުމުގެ ޕްރޮގްރާމްތައް ކުރިއަށްދާ މިންވަރު ބައްލަވައިލައްވައިފައެވެ.
މިނިސްޓަރ ޝާހިދާއި ސަފީރު މަހާވަރު ވަނީ ރައީސް ޞާލިޙުގެ ސަރުކާރުގައި ވޭތުވެދިޔަ 3 އަހަރު ދުވަހުގެ ތެރޭގައި އިންޑިއާ-ރާއްޖޭގެ ގުޅުމުގައި ހޯދިފައިވާ މުހިންމު ލަނޑުދަނޑިތަކާ މެދު ހިތްހަމަޖެހުން ފާޅުކުރައްވައިފައެވެ. މިނިސްޓަރ ޝާހިދު ވަނީ ކޮވިޑް-19ގެ މި ދަތި ދަނޑިވަޅުގައި އިންޑިއާ ސަރުކާރުން ވެދެއްވި ދީލަތި އެހީތެރިކަމަށް ޝުކުރު އަދާކުރައްވައި، އިންޑިއާއަކީ ބޭނުން ޖެހިއްޖެ ކޮންމެ ދަނޑިވަޅެއްގައި އަބަދުވެސް ބަރޯސާވެވިދާނެ ޤައުމެއްކަން ފާހަގަކުރައްވައިފައެވެ.
މަހާވަރު ދެއްކެވި ވާހަކަފުޅުގައި، ރާއްޖެއާއި އިންޑިއާއާ ދެޤައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެކަމުގެ ޔަޤީންކަން ދެއްވިއެވެ.
Ads by STO
