ބިންތައް ޓާޓާއަށް ދިނީ އިންޑިއާގެ ބާރު ރާއްޖޭގައި އިންތިހާއަށް ގަދަވެފައި އޮތުމުން: ޑރ. މުޢިއްޒު
ޓާޓާ ކުންފުންޏަށް ބިންތައް ހަވާލުކުރީ އިންޑިއާގެ ބާރު ދިވެހިރާއްޖޭގައި އިންތިހާއަށް ގަދަވެފައި އޮތީމައި ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ކުރީގެ އޯޑިއޯން ސިނަމާ ހުރި ބިމާއި ކުރީގެ ނާދީ ހުރި ބިމުގައި ލަގްޒަރީ ފްލެޓް އަޅަން ސަރުކާރުން އިންޑިއާގެ ޓާޓާ ކުންފުންޏަށް ހަވާލުކުރީ 2010ވަނަ އަހަރުގައެވެ. ޓާޓާއާ އެކު ހަދައިފައިވާ އެ އެއްބަސްވުމުން ދައުލަތަށް ނުވަ މިލިއަން ޑޮލަރުގެ ފައިދާއެއް ވާނެ ކަމަށް ޕްލޭނިން މިނިސްޓްރީން އޭރު ވަނީ ބުނެފައެވެ.
އެހެން ނަމަވެސް ޓާޓާ ކުންފުންޏަށް މާލޭގައި ފްލެޓު އަޅަން ހަވާލުކުރި އެއްބަސްވުމާ އެއްގޮތަށް މަސައްކަތެއް ނުކުރެވުނެވެ. އެއާ އެކު އެ ފްލެޓްތަކުގެ މައްސަލައިގައި އާބިޓްރޭޝަންއަަށް ގޮސް ބަދަލު ދިނުމުން ސަލާމަތްވުމަށް ސަރުކާރުން މިހާރު ދަނީ މަސައްކަތް ކުރަމުންނެވެ.
މި މައްސަލައާ ގުޅިގެން އޮންލައިން ނޫސް "ޖަޒީރާ"އަށް ދެއްވި ބަސްދީގަތުމެއްގައި ޑރ. މުއިއްޒު ވިދާޅުވީ އެ މައްސަލައިގައި އިންޑިއާގެ ކޯޓަކަށް ދިއުމުން ރާއްޖެއަށް އެ މައްސަލަ ކާމިޔާބުވާނެކަމުގެ އުންމީދެއް ލިބިފައި ނުވާ ކަމަށެވެ. އެއާ އެކު ދެން ހުށަހެޅީ މާލެތެރެ ތޮއް ނުޖެހޭނެ ގޮތަކަށް މާލޭގެ ދެކުނު ފަރާތަށް އެ ދެ ބިން ބަދަލުކުރަން ކަމަށެވެ.
މީގެ އިތުރުން ޑރ. މުއިއްޒު ވިދާޅުވީ ޓާޓާއަށް އެ ދެ ބިން ސަރުކާރުން ދިނީ އިންޑިއާގެ ބާރު ރާއްޖޭގައި އިންތިހާއަށް ގަދަވެފައި އޮތުމުން އިންޑިއާ ކުންފުންޏަކަށް ދިނުމުގެ މަޤްޞަދުގައި ކަމަށެވެ.
މުއިއްޒު ވެސް މި ފެންނަނީ ސަރުކާރުގެ ކުށްދައްކާ މީހެއްގެ ގޮތުގައި. ތި ހުރިހައި ކަމެއް މުއިއްޒު ބައިވެރިވި ޕީޕީ އެމް ސަރުކާރުގައި ވެސް ކުރިޔަށް ދިޔައެއްނު.