ރާޖް ކުންދްރާ އެނބުރި އިންސްޓްގްރާމްއަށް، ޝިލްޕާ ފޮލޯއެއް ނުކުރޭ
ބޮލީވުޑްގެ އެކްޓްރެސް ޝިލްޕާ ޝެޓީ ކުންދްރާގެ ފިރިމީހާ ރާޖް ކުންދްރާ، ގިނަ ދުވަސްތަކަކަށް ފަހު އޭނާގެ އިންސްޓަގްރާމް އެކައުންޓު އަލުން އެކްޓިވޭޓް ކޮށްފިއެވެ.
ބަރަހަނާ ވީޑިއޯ އުފެއްދި މައްސަލައިގައި ރާޖް ކުންދްރާ ހައްޔަރުކޮށް، ކަފާލާތުގެ ދަށުން ދޫކޮށްލި ފަހުން އޭނާ ވަނީ އޭނާގެ ސޯޝަލް މީޑިއާ ހުރިހާ އެކައުންޓެއް ޑީއެކްޓިވޭޓް ކޮށްލައިފައެވެ.
އިންސްޓަގްރާމް އަލުން ބޭނުން ކުރަން ފެށިނަމަވެސް، ރާޖްގެ ހަރަކާތްތަކުން ދައްކުވައިދެނީ، އޭނާ އަދިވެސް ސޯޝަލް މީޑިއާއަށް ތައްޔާރެއް ނޫން ކަމަށެވެ.
ރާޖް ކުންދްރާގެ ޕްރޮފައިލް އެންމެންނަށް ފެންނަ ގޮތަށް ބޭންދި ނަމަވެސް، އޭގައި އޭނާގެ އެއްވެސް ޕޯސްޓެއް ނެތެވެ. މީގެ އިތުރުން ރާޖް ކުންދްރާ، އޭނާގެ އަންހެނުން ޝިލްޕާ ފޮލޯއެއް ވެސް ނުކުރެއެވެ.
ރިޕޯޓުތަކުން ބުނާ ގޮތުގައި ރާޖް ކުންދްރާ ފޮލޯ ކުރަނީ އެންމެ އެކައުންޓެކެވެ. އެއީ 2020ވަނަ އަހަރު އޭނާއާއި ޝިލްޕާ ހުޅުވި "ބަސްތިއަން ރެސްޓޯރަންޓް"ގެ އިންސްޓަގްރާމް އެކައުންޓު އެކަންޏެވެ.
ރާޖް ކުންދްރާ ހައްޔަރުކޮށް، ކަފާލާތުގެ ދަށުން ދޫކޮށްލި ފަހުން ޝިލްޕާ ކުރި ޕޯސްޓެއް ވަނީ އާންމުންގެ ސަމާލުކަމަށް އައިސްފައެވެ. އެ ޕޯސްޓުގައި އޭނާ ބުނެފައި ވަނީ، ކުށެއް ކުރެވުމުން އެ ކުށުން އިބުރަތް ލިބިގަންނަން ޖެހޭނެ ކަމަށާއި އޭނާއަށް ވެސް ކުށް ކުރެވުނު ކަމަށެވެ. އަދި ދުވަސްތަކަކަށް ފަހު އެ ކުށުގެ ސަބަބުން އުފާވެރިކަން ގެނެސްދޭ ކަމަށް ވެސް ބުނެފައިވެއެވެ.
