އެމްޑީޕީގެ ކެމްޕެއިނަށް ގާސިމް ކޮމަންޑޫއަށް ވަޑައިގަންނަވަނީ

އަންނަ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި-އިލެކްޝަންގައި، ވެރިކަން ކުރާ މައި ޕާޓީ، އެމްޑީޕީގެ ފަރާތުން އެ ދާއިރާއަށް ވާދަކުރައްވާ ކެންޑިޑޭޓް މުހައްމަދު ރާޝިދަށް ތާއީދު ހޯއްދެވުމަށް ވެރިކަން ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހީމް ވެސް މަސައްކަތް ފައްޓަވާ ގޮތަށް ހަމަޖެހިއްޖެއެވެ.

Ads by Sosun Fihaara

"ދެން"އަށް މައުލޫމާތު ދެއްވަމުން ޖޭޕީގެ ތަރުޖަމާނު އަލީ ސޯލިހު ވަނީ ގާސިމް ކޮމަންޑޫއަށް ވަޑައިގަންނަވާކަން ކަށަވަރު ކޮށްދެއްވައިފައެވެ.

އެހެން ނަމަވެސް، އެމަނިކުފާނު އެރަށަށް ވަޑައިގަންނަވާނެ ދުވަހެއް ވިދާޅެއް ނުވެއެވެ. އޭނާ ވިދާޅުވީ ދަތުރާ ގުޅޭ މައުލޫމާތު ފަހުން ހާމަ ކުރައްވާނެ ކަމަށެވެ.

އެނގިފައިވާ ގޮތުގައި ގާސިމްގެ މި ދަތުރުގައި ސަރުކާރުގައި ހިމެނޭ ޖުމްހޫރީ ޕާޓީގެ ވަޒީރުންނާއި، އެހެން މަގާމުތަކުގެ ބޭފުޅުން ވެސް ކޮމަންޑޫ ދާއިރާއަށް ވަޑައިގަންނަވާނެއެވެ.

ރާޝިދަށް ތާއީދު ހޯދުމަށް އެމްޑީޕީގެ ރައީސް މުހައްމަދު ނަޝީދު ވެސް މިއަދު ވަނީ ކޮމަންޑޫއަށް ވަޑައިގެންފައެވެ.

މި ދަތުރުގައި އެމްޑީޕީގެ އިސް ލީޑަރު، ރައީސް އިބްރާހީމް މުހައްމަދު ސޯލިހުއަށް ބައިވެރިވެވަޑައިނުގެންނެވުނީ އެމަނިކުފާނު ކޮވިޑް-19އަށް ޕޮޒިޓިވްވުމާ ގުޅިގެންނެވެ.

އަންނަ މަހުގެ 05ވަނަ ދުވަހު ބާއްވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާ ދިމާކޮށް ސަރުކާރުން އެ ދާއިރާގައި ގިނަ މަޝްރޫއުތަކެއް ހިންގަން ފަށައިފައިވާއިރު، މިއީ އިންތިހާބަށް ނުފޫޒު ފޯރުވުމުގެ އަމަލެއްގެ ގޮތުގައި ގިނަ ބަޔަކު ސިފަ ކުރެއެވެ.