އިބްރާހިމްއާއި ޕަލަކް އުޅެނީ ލޯބީގެ ގޮތުން ގުޅިގެން!
ސައިފް އަލީ ޚާންގެ ދޮށީ ފިރިހެން ދަރި އިބްރާހިމް އަލީ ޚާންއާއި ބޮލީވުޑްގެ ތަރި ޝްވެތާ ތިވާރީގެ ދޮށީ ދަރި ޕަލަކް ތިވާރީ އުޅެނީ ލޯބީގެ ގޮތުން ގުޅިގެން ކަމުގެ އަޑުތަކެއް ފެތުރެން ފަށައިފިއެވެ.
ޕަލަކްއާއި އިބްރާހިމް އެކުގައި މުމްބާއީގެ ސަބަރބްއަކުން ދާދި ފަހުން ފެނިގެން، ޕަޕަރާޒީން ވަނީ އެމީހުންގެ ފޮޓޯއާއި ވީޑިއޯ ނަގައި މުޅި އިންޓަނެޓް ފުރައިލައިފައެވެ.
އެ ފޮޓޯތަކާއި ވީޑިއޯތައް ދައުރުވާން ފެށުމާ އެކު، ޕަލަކްއަށް ވަނީ ވަރަށް ބޮޑަށް ފާޑުކިޔުން ވެސް އަމާޒުވެފައެވެ.
ރިޕޯޓަރުން ފޮޓޯނަގަން ފެށުމާ އެކު ޕަލަކް އަވަަހަށް އޭނަގެ މޫނު ފޮރުވައިގެން، ކާރަށް އަރައިގެން އެތަނުން ދާ މަންޒަރު ވީޑިއޯއިން ފެނެއެވެ. އެކަމަކު އިބްރާހިމް ވަރަށް ހަމަޖެހިގެން ހުރުމުން، ބައެއް މީހުން ބުނެފައި ވަނީ ޕަލަކް އިބްރާހިމްއާ އެކު އުޅެނީ "ޓައިމްޕާސް"އަށް ކަމަށާއި ދެއްކުންތެރިވާން ވެގެން އެކަނި ކަމަށެވެ. ނަމަވެސް އިބްރާހިމް އެ ގުޅުމާ މެދު ލަދު ނުގަންނަކަން ފާހަގަކޮށް އޭނައަށް މީހުން ތައުރީފު ކޮށްފައިވެއެވެ.
ޕަަލަކްއާއި އިބްރާހިމް އެކުގައި ފެނިގެން ހިނގި މި ކަންތައްގަނޑަށް ފަހު، ދެން އެމީހުން އެކުގައި ނުފެންނާނެ ކަމަށް ވެސް ބައެއް ރިޕޯޓުތަކުން ބުނެފައިވެއެވެ. އެގޮތުން ބޮލީވުޑްލައިފަށް އިބްރާހިމްގެ ގާތް މީހަކު މައުލޫމާތު ދެމުން ބުނީ، ޕަލަކް އޭނަގެ މޫނު ފޮރުވުމުން އެކަމާ އިބްރާހިމް ވަރަށް ހިތްހަމަ ނުޖެހުނު ކަމަށެވެ.
