ރައީސް ޔާމީންގެ ހުކުމް އަވަސް ކުރީ ސަރުކާރުގެ ނުފޫޒުން: އިދިކޮޅު
ޓޫރިސްޓް ރިސޯޓެއް ތަރައްގީކުރުމަށް ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އުފުލައިފައިވާ ދެ ދައުވާގެ ހުކުމް އިއްވުން ކުރިން ހަމަޖެއްސި ތާރީޚް އަވަސްކޮށްފައި ވަނީ ޤާނޫނާ ޚިލާފަށް ކަމަށާއި އެކަން ކޮށްފައިވަނީ ސަރުކާރުގެ ނުފޫޒުގެ ސަބަބުން ކަމަށް އިދިކޮޅުން ވިދާޅުވެއްޖެއެވެ.
ރިޝްވަތު ނެގުމާއި މަނީ ލޯންޑަރ ކުރި ކަމަށް ބުނެ ދައުލަތުން ކޮށްފައިވާ މި ދެ ދައުވާއަށް ހުކުމް އިއްވަން މީގެ ކުރިން ތާވަލު ކުރީ މިއަހަރުގެ ނޮވެމްބަރު މަހުގެ 25އަށެވެ. ނަމަވެސް ޙުކުމް ކުރުން މި އަންނަ ޖޫން މަހަށް ވަނީ އަވަސްކޮށްފައެވެ.
މިއަދު ނެރުނު ބަޔާނެއްގައި ޕީޕީއެމްއިން ވިދާޅުވީ، ދެ ފަރާތެއްގެ ދެމެދުގައި ހިނގަމުންދާ މައްސަލައެއް ކުރިއަށް ގެންދިއުމަށް އެކުލަވާލެވޭ ތާރީޚްތަކަށް، އެ ދެފަރާތާ މަޝްވަރާ ކުރުމެއް ނެތި ބަދަލު ގެނައުމަކީ ޖިނާޢީ އިޖުރާޢަތުގެ ޤާނޫނުއާއި މުޅިން ޚިލާފު ކަމެއް ކަމަށެވެ.
އަދި މިހާރު އޮތް ގޮތުން ކުރިއަށް އޮތް 3 މަހެއްހައި ދުވަހު ކޮންމެ ދެދުވަހަކުން އެއްދުވަހަކުހެން ކަހަލަ ގޮތަކަށް ރައީސް ޔާމީން ހޭދަ ކުރައްވަން ޖެހިވަޑައިގަންނަވާނީ މިމައްސަލައިގެ އަޑު އެހުންތަކުގައި ކޯޓުގައި ކަމަށް ވިދާޅުވިއެވެ.
އިދިކޮޅުން ވިދާޅުވީ، މިއީ ސަރުކާރާއި ސަރުކާރު ހިންގާ ޕާޓީގެ ނުފޫޒު އޮވެގެން ގެނެސްފައިވާ ބަދަލެއްގެ ގޮތުގައި ދިވެހި ރައްޔިތުން ސިފަ ކުރާ ކަމަށެވެ.
މީގެ އިތުރުން ރައީސް ޔާމީން ހުންނަވަންޖެހޭނީ ޖަލުގައި ކަމަށް ސަރުކާރުގެ ވަޒީންނާއި މަޖިލީސް މެންބަރުންގެ އިތުރުން، ސަރުކާރުގެ އިސް މަޤާމުތަކުގައި ތިބި އެމް.ޑީޕީގެ އެކްޓިވިސްޓުން ސިޔާސީ ޕޯޑިއަމްތަކާއި ސޯޝަލް މީޑިއާގެ އިތުރުން ތަފާތު ފޯރަމްތަކުގައި ވެސް ވިދާޅުވާ ކަމަށާއި އެކަމަށް ބާރު އަޅާ މަސައްކަތް ކުރަމުން ދާކަން ވެސް ހާމަވެފައިވާ ކަމަށް ވިދާޅުވިއެވެ.
"އެހެންކަމުން ދަށު ކޯޓުތަކާއި ހައިކޯޓުގައި ހިނގާ މައްސަލަތަކަށް ސަރުކާރުގެ އިސްވެރިންނާއި އެމް.ޑީ.ޕީގެ ފަރާތުން ނުފޫޒު ފޯރުވާ އަތް ބާނައިގެން އެމީހުން ބޭނުންވާ ގޮތަށް ކަންކަން ކުރުމަށް ކުރަމުން ގެންދާ މަސައްކަތް އެންމެ ހަރުކަށި އިބާރާތުން ކުށްވެރިކުރަމެވެ. އަދި މި މައްސަލަ ކުރިއަށް ގެންދިއުމަށް އެކުލަވައިލި ތާވަލަށް މިހައި ބޮޑު ބަދަލެއް ގެންނަން ޖެހުނު ސަބަބެއް ސާފުކޮށް އެކަމުގައި އަޅަން ޖެހޭ ފިޔަވަޅުތައް އެޅުމަށްކަމާ ބެހޭ މުއައްސަސާތަކަށް ގޮވައިލަމެވެ." އިދިކޮޅުން ނެރުނު ބަޔާނުގައި ވިދާޅުވިއެވެ.
