މަޖިލީހުގެ ގޮނޑި އިތުރުވެގެން، އެމްޑީޕީއަށް ކަމެއް ކޮށްދެވިދާނެ ކަަމަށް ރައްޔިތުން ގަބޫލެއް ނުކުރޭ: ރައީސް ޔާމީން
ރައްޔިތުންގެ މަޖިލީހުގެ ގޮނޑީގެ އަދަދު އިތުރުވެގެން، ސަރުކާރު ހިންގާ މައި ޕާޓީ އެމްޑީޕީއަށް ކަންތައްތަކެއް ކުރެވިދާނެ ކަމަށް ރައްޔިތުން ގަބޫލު ނުކުރާ ކަމަށް އިދިކޮޅު ލީޑަރު، ރައީސް ޔާމީން ވިދާޅުވެއްޖެއެވެ.
ރައްޔިތުންގެ މަޖިލީހުގައި މިހާރު ހުސްވެފައިވާ ށ.ކޮމަންޑޫ ދާއިރާގެ ގޮނޑިއާ އެކު، އެމްޑީޕީއަށް 65 ގޮނޑި ލިބިފައި އޮތެވެ. އެ ދާއިރާގެ މެމްބަރު ހުސައިން ވަހީދު އަވަހާރަވުމުން، ހުސްވި ގޮނޑިއަށް މެމްބަރަކު އިންތިހާބު ކުރުމަށް ބާއްވާ ބައި-އިލެކްޝަން ހޮނިހިރު ދުވަހު އޮންނާނެއެވެ.
އެމްޑީޕީން ބުނަމުން ގެންދަނީ، އެ ގޮނޑި ދިފާއު ކުރުމަކީ، ކޮމަންޑޫ ދާއިރާގެ ތަަރައްގީއަށާއި، އެޖެންޑާ-19ގެ ނުފުއްދި ހުރި ވައުދުތައް ފުއްދުމަށް ޓަކައި، ކޮންމެހެން ވެސް ކުރަން ޖެހޭ ކަމެއް ކަމަށެވެ.
ޗެނަލް13ގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ އިތުރު ގޮނޑިއެއް ލިބުމުން، އެމްޑީޕީއަށް ކުރެވޭނެ ކަމެއް އޮތް ކަމަށް ދެކެވަޑައިނުގަންނަވާ ކަމަށެވެ. އޭގެ ބަދަލުގައި ޕީޕީއެމްގެ ކެނޑިޑޭޓު ހޮވައިފި ނަމަ، ސަރުކާރު ޖަވާބުދާރީ ކުރުވައި، ރައްޔިތުންގެ އަޑު އުފުލޭނެ ކަމަށް ވެސް އެމަނިކުފާނު ވިދާޅުވިއެވެ.
"ސަރުކާރުން މިކުރާ ގާނޫނާ ހިލާފު ކަންތައްތަކަށް އަޑު އުފުލޭނެ. އަޅުގަނޑުމެންނަށް މިހާރު ކުރެވޭނެ ކަމަކީ، އަޑު އުފުލައިފައި، ގާނޫނީ މަގުން ހިނގުން." އެމަނިކުފާނު ވިދާޅުވިއެވެ.
އިންތިހާބަށް ނުފޫޒު ފޯރުވުމުގެ މައްސަލަތަކެއް ފެންމަތިވެ، އެ މައްސަލަތައް އެންޓި ކޮރަޕްޝަން ކޮމިޝަނަށް ހުށަހެޅިއިރު، އެކޮމިޝަން ގާނޫނީ ހުސްކަމެއްގެ ތެރޭގައި އޮތުމުން ކަންބޮޑުވުން ވެސް ރައީސް ޔާމީން ފާޅުކުރެއްވިއެވެ.
އެ މަނިކުފާނު ވިދާޅުވީ އޭސީސީ "ޕެރެލައިޒް" ކޮށްލައިފައި އޮތްއިރު، ގާނޫނާ ހިލާފު ނުފޫޒެއް އިންތިހާބަށް ފޯރުވާނަމަ، އެކަން އިލެކްޝަންސް ކޮމިޝަނަށް ވެސް ބެލެން ޖެހޭ ކަމަށާއި، މައްސަލަ ބެލޭނީ ހަމައެކަނި އޭސީސީއަށް ނޫން ކަމަށެެވެ.
"ސަރުކާރު ޖަވާބުދާރީ ކުރުވުމުގައި، ހަމަ ހުރިހާ މުއައްސަސާތަކެއް ވެސް މިވަނީ ޕެރެލައިޒް ވެފައި. އެހައި ވެސް ހުދުމުހުތާރުކޮށް ހިނގާ ސަރުކާރެއް މި ހިނގަނީ." ރައީސް ޔާމީން ވިދާޅުވިއެވެ.
ކުރިއަށް އޮތް ބައި-އިލެކްޝަނުގައި ޕީޕީއެމްގެ ފަރާތުން ވާދަ ކުރައްވަނީ އަލްއުސްތާޒް މޫސާ ފަތުހީއެވެ. އެމްޑީޕީގެ ފަރާތުން މުހައްމަދު ރާޝިދު ވާދަކުރައްވާއިރު، އެމްއެންޕީގެ ފަރާތުން ވާދަކުރައްވަނީ އަބްދުލްހަންނާން އިދުރީހެވެ.
