ނަތީޖާއިން އެނގުނީ ސަރުކާރުން މިހައިތަނަށް ކުރި މަސައްކަތް ރައްޔިތުން ބަލައިގެންފިކަން: ރޮޒައިނާ
ށ.ކޮމަންޑޫ ދާއިރާގެ ބައި-އިލެކްޝަންގެ ނަތީޖާއިން އެނގިގެން ދިޔަ ކަމަކީ ސަރުކާރުން މިހައިތަނަށް ކުރަމުން އައި މަސައްކަތްތައް ރައްޔިތުން ބަލައިގެންފައިވާ މިންވަރު ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެެއެވެ.
އޭނާ މިހެން ވިދާޅުވެފައި ވަނީ ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި ރޭ ވާހަކަ ދައްކަވަމުންނެވެ.
އޭނާ ވިދާޅުވި ގޮތުގައި، އެމްޑީޕީއަށް މި އިންތިހާބުގައި ކާމިޔާބީ ލިބުނީ މި ތިން އަހަރުގެ ތެރޭގައި ސަރުކާރަށް މަސައްކަތްތައް ކުރެވިފައި ހުރި ގޮތުން ކަމަށެވެ. އަދި 200އަށް ވުރެ ގިނަ ވޯޓުގެ ތަފާތުން، އިންތިހާބުގައި އެމްޑީޕީގެ ކެނޑިޑޭޓަށް ކުރި ލިބިގެން ދިޔުމަކީ ބޮޑު ކުރިއެރުމެއް ކަމަށް ވެސް ރޮޒައިނާ ސިފަ ކުރެއްވިއެވެ.
އެގޮތުން ރައީސް އިބްރާހީމް މުހައްމަދު ޞާލިހުއާއި ކޮމަންޑޫ ދާއިރާގެ ކުރީގެ މެމްބަރު ހުސައިން ވަހީދު އެ ދާއިރާ ތަރައްގީ ކުރެއްވުމަށް ކުރެއްވި މަސައްކަތްތައް ރައްޔިތުން ބަލައިގެންފިކަން، ނަތީޖާއިން ހާމަވާ ކަމަށް ވެސް އޭނާ ވިދާޅުވިއެވެ.
"ތިން ރަށުން ވެސް ހަމަ މެޖޯރިޓީ ލިބިގެން މިދިޔައީ. އެހެންވީމަ، ތިން ރަށުގައި ވެސް ކުރެވެމުންދާ މަސައްކަތްތަކަކީ ރައްޔިތުން ބަލައިގަންނަ، ރައްޔިތުން އެއާ އެކު ކުރިއަށްދާން ބޭނުންވާ ކަންކަން." ރޮޒައިނާ ވިދާޅުވިއެވެ.
އިއްޔެ ބޭއްވި ށ. ކޮމަންޑޫ ދާއިރާގެ ފޯރިގަދަ ވަގުތީ ނަތީޖާއިން ދައްކާ ގޮތުގައި، އެމްޑީޕީގެ ކެނޑިޑޭޓު މުހައްމަދު ރާޝިދަށް ލިބިފައި ވަނީ، ޖުމްލަ 1401 ވޯޓެވެ.
ރާޝިދުއާއި އެންމެ ގާތުން ވާދަކުރި ޕީޕީއެމްގެ ކެނޑިޑޭޓް މޫސާ ފަތުހީ އާދަމަށް ލިބިފައި ވަނީ ޖުމްލަ 1161 ވޯޓެވެ. އެމްއެންޕީގެ ފަރާތުން މި އިންތިޚާބުގައި ވާދަކުރިން އަބުދުލް ހަންނާނު އިދުރީހަށް ލިބިފައި ވަނީ 323 ވޯޓެވެ.
އިދިކޮޅުން ބުނެފައި ވަނީ ހަނި ތަފާތަކުން އެމްޑީޕީއަށް މި އިންތިހާބު ކާމިޔާބު ކުރެވުނީ، މިލިއަނުން ހަރަދުކޮށް، ވަރަށް ބޮޑަށް ނުފޫޒު ފޯރުވައިގެން ކަމަށެވެ.
ނަމަވެސް އެމްޑީޕީން ބުނަނީ އެފަދަ ނުފޫޒެއް ނުފޯރުވާ ކަމަށާއި، ބައި-އިލެކްޝަނާ ގުޅިގެން މަޝްރޫއުތައް ހިންގުމަކީ އިއްތިފާގަކުން ހިނގި ކަމެއް ކަމަށެވެ.
ކާމިޔާބުގެ ސއްރަކީ މިހާތަނަށް ކުރި ވައްކަން ތައް.