މި ހަފްތާގައި މަޖިލީހުން ފަސް ބިލެއްގެ މަސައްކަތް ފަށަނީ
ރައްޔިތުންގެ މަޖިލީހުގައި މި ހަފްތާގައި ފަސް ބިލެއްގެ މަސައްކަތް ފައްޓަވާނެ ކަަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ މިއަހަރުގެ ފުރަތަމަ ދައުރުގެ ދެވަނަ ޖަލްސާ ފައްޓަވައި ދެއްވައި މިއަދު ވާހަކަފުޅު ދައްކަވަމުން ނަޝީދު ވިދާޅުވީ އެ ބިލުތަކަކީ، މަހިބަދޫ ދާއިރާގެ މެމްބަރު އަހްމަދު ތޯރިގު ހުށަހެޅުއްވި ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއަށް އިސްލާހު ގެނައުމުގެ ބިލުގެ އިބްތިދާއީ ބަހުސް ކުރިއަށް ގެންދިޔުމާއި، ކަނޑިތީމު ދާއިރާގެ މެމްބަރު އަބްދުއްޝަހީމް އަބްދުލްހަކީމް ހުށަހެޅުއްވި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލާއި، މަކުނުދޫ ދާއިރާގެ މެމްބަރު މުހައްމަދު ރާއީ ހުށަހެޅުއްވި ނެތި ދިޔުމުގެ ބިރު ހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކުރުމުގެ ބިލާއި، ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުލްހަކީމް ހުށަހަޅުއްވައިފައިވާ ފެނާ ނަރުދަމާގެ ގާނޫނަށް އިސްލާހު ގެނައުމުގެ ބިލާއި، މިލަންދޫ ދާއިރާގެ މެމްބަރު އަލީ ރިޒާ ހުށަހަޅުއްވައިފައިވާ ކުދި އަދި މެދު ފަންތީގެ ވިޔަފާރީގެ ގާނޫނަށް އިސްލާހު ގެނައުމުގެ ބިލެވެ.
މީގެ އިތުރުން 16 ބިލެއް ކޮމެޓީ މަރުހަލާގައިވާކަން ފާހަގަކުރައްވައި، ރައީސް ނަޝީދު ވިދާޅުވީ މާލިއްޔަތު ކޮމިޓީގައި އެއް ބިލް، އިގްތިސާދީ ކޮމިޓީގައި އެއް ބިލް، އިޖްތިމާއީ ކޮމިޓީގައި ހަތަރު ބިލް، 241 ކޮމިޓީގައި އެއް ބިލް، ގައުމީ ތަރައްގީ އާއި ތަރިކައިގެ ކޮމިޓީގައި އެއް ބިލް، ލާމަރުކަޒީ ކޮމިޓީގައި އެއް ބިލް، ޖުޑިޝަރީ ކޮމިޓީގައި ދެ ބިލުގެ އިތުރުން ވެސް، ޖޮއިންޓް ކޮމިޓީތަކުގައި ފަސް ބިލް އެބައޮތް ކަމަށެވެ.
މިދައުރުގައި މުހިންމު މަސައްކަތްތަކެއް މަޖިލީހުން ކުރާނެކަން ވެސް ރައީސް ނަޝީދު ފާހަގަކުރެއްވިއެވެ.
Ads by STO
