އިލްމާއި އައިއޯސީސީ ގުޅިގެން ޕްރީސްކޫލް ދަރިވަރުންނަށް ފޮތް ސެޓެއް އެކުލަވައިލަނީ
ޢިލްމު އިންސްޓިއުޓް ފޯ އިސްލާމިކް ސްޓަޑީޒްއާއި އިސްލާމިކް އޮގަނައިޒޭޝަންފޯ ކަލްޗަރ އެންޑް ސިވިލައިޒޭޝަން (އައިއޯސީސީ)އާ ގުޅިގެން ޕްރީ ސްކޫލް މަރުޙަލާގައި ކިޔަވައިދޭން ޚާއްޞަކޮށްގެން ފޮތް ސެޓެއް އެކުލަވައިލުމުގެ އެއްބަސްވުމުގައި ސޮއިކޮށްފިއެވެ.
އިލްމު އިންސްޓިޓިއުޓުން މިއަދު ބުނި ގޮތުގައި، މި ފޮތް ސެޓްގައި ހިމެނެނީ ޖުމުލަ 40 ފޮތެވެ. މި ފޮތްތަކަކީ ބޭބީ ނާސަރީ، ނާސަރީ، ޖޭކޭޖީ، އަދި އެސްކޭޖީ މި ހަތަރު މަރުޙަލާގެ ފޮތްތަކެވެ. މިފޮތްތައް ތައްޔާރުކުރެވޭ ދާއިރާތަކަކީ އިސްލާމް، ދިވެހި، ޤުުރުއާން، ހިސާބު، އިނގިރޭސި، ސޯޝަލް ސްޓަޑީސް، ސައެންސް އެންޑް ޓެކްނޮލެޖީ، ކްރިއޭޓިވް އާރޓްސް، ހެލްތު އެންޑް ވެލްބީން، އަދި ވެލިއުސް އެންޑް އެތިކްސްއެވެ.
މި އިން ކޮންމެ ދާއިރާއަކުން ހަތަރު މަރުޙަލާގެ ފޮތް ހިމެނޭނެ ކަމަށް އިލްމު އިންސްޓިޓިއުޓުން ބުނެފައިވެއެވެ. މި ފޮތްތައް އެކުލަވައިލެވެނީ ނޭޝަނަލް އިންސްޓިޓިއުޓް ފޯ އެޑިއުކޭޝަނުން ކަނޑައަޅައިފައިވާ މަންހަޖަށް ރިޢާޔަތްކޮށް، އެ އިންސްޓިއުޓްގެ ކުރީގެ އެޑިއުކޭޝަން ޑިވެލޮޕްމަންޓް އޮފިސަރު، އަދި ކަރިކިއުލަމް ޑިވެލޮޕަރ އަލްފާޟިލާ މަރިޔަމް ޝަޒްނާއެވެ. މަރިޔަމް ޝަޒްނާއަކީ އިސްލާމިކް އޮގަނައިޒޭޝަންފޯ ކަލްޗަރ އެންޑް ސިވިލައިޒޭޝަން (އައިއޯސީސީ)ގެ ތިންކު ޓޭންކުގެ މެންބަރެކެވެ.
