އެމްޑީޕީގެ ގައުމީ މަޖިލީހުގައި މިރޭ ބޮޑެތި ކަންތައްތަކެއް ނިންމަނީ
ވެރިކަން ކުރާ މައި ޕާޓީ، އެމްޑީޕީއިން މިރޭ ބާއްވާ ގައުމީ މަޖިލީހުގެ ޖަލްސާގައި ބޮޑެތި ކަންތައްތަކެއް ނިންމަން އެ ޕާޓީގެ ރައީސް މުހައްމަދު ނަޝީދު ހުށަހަޅުއްވައިފިއެވެ.
އެމްޑީޕީން މިރޭ ބާއްވާ ގައުމީ މަޖިލީހުގެ ޖަލްސާގައި ގިނަ އިސްލާހުތަކެއް ހުށަހަޅުއްވަން ނަޝީދު ވަނީ ނިންމަވައި އެކަން އެ މަޖިލީހުގެ މެމްބަރުންނާ މިއަދު ހިއްސާ ކުރައްވައިފައެވެ. ގައުމީ މަޖިލީހުގެ ވަޓްސްއަޕް ގުރޫޕަށް ނަޝީދު ފޮނުއްވި އިސްލާހުތަކާ އެކު ވިދާޅުވީ ގާނޫނު އަސާސީ އިސްލާހު ކުރުން މިހާރު ވެސް ލަސްވެފައިވާ ކަމަށެވެ.
ނަޝީދު ހުށަހަޅުއްވާފައިވާ ކަންކަމުގެ ތެރޭގައި ރިޔާސީ އިންތިހާބުގެ ދެވަނަ ބުރަކަށް ނުގޮސް ފަސޭހަކަމާ އެކު ކާމިޔާބުކުރެވޭނެ ގޮތެއް ކަނޑައެޅުމަށް ވަނީ އިސްލާހެއް ހިމަނައިފައެވެ. އަދި އެކަން ގައުމީ މަޖިލީހުން ފާސްކޮށް އަންނަ ޖޫން މަހުގެ ކުރިން ޕާޓީގެ ކޮންގްރެސްއެއް ބާއްވައި އެ ބަދަލުތައް ގެނައުމަށް ފާސްކުރަން މިރޭ ހުށަހަޅަން ވަނީ ނިންމައިފައެވެ.
ރައީސް ނަޝީދު ހުށަހަޅުއްވާ ބައެއް އިސްލާހުތައް
- ޖުޑިޝަލް ސާވިސް ކޮމިޝަން އެކުލެވިގެންވާ ގޮތަށް އިސްލާހުތަކެއް ގެނައުން.
- ސުޕްރީމް ކޯޓުގެ ފަނޑިޔާރުންގެ އަދަދު ގާނޫނު އަސާސީގައި ކަނޑައެޅުން
- ރިޔާސީ އިންތިހާބުގައި ވާދަ ކުރައްވާ ކެނޑިޑޭޓުންގެ ތެރެއިން ޖުމުލަ ވޯޓްގެ 30 ޕަސެންޓަށް ވުރެން އިތުރަށް ވޯޓް ހޯއްދަވާ ކެނޑިޑޭޓަކީ އިންތިހާބު ކާމިޔާބު ކުރާ ކެނޑިޑޭޓްކަމުގައި ކަނޑައަޅަން ގާނޫނު އަސާސީއަށް އިސްލާހު ގެނައުން
- ލާމަރުކަޒީ ގާނޫނުގެ ދަށުން އިތުރު އުޞޫލުތަކެއް ގެނައުން
- ރާއްޖޭގެ ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުމަށާއި އަދި އެ ވޯޓް ނަގާނެ ތާރީހެއް، އަދި އެ އިންތިހާބުގެ ނަތީޖާއާ އެއްގޮތަށް ގާނޫނު އަސާސީގެ ވެރިކަމުގެ ނިޒާމް ކަނޑައެޅުން
އިންތިހާބާ ބެހޭ ގާނޫނުގައި މިހާރު ބުނާ ގޮތުން ރިޔާސީ އިންތިހާބު ކާމިޔާބު ކުރެވޭނީ 50 އިންސައްތައަށް ވުރެ މަތިން ވޯޓު ލިބޭ ކެނޑިޑޭޓަކަށެވެ. އަދި އެއްވެސް ކެނޑިޑޭޓަކަށް 50 އިންސައްތަ ނުލިބޭ ނަމަ އިންތިހާބުގެ ދެވަނަ ބުރަކަށް ދާން ޖެހެއެވެ. މަލްޓި ޕާޓީ ނިޒާމުގެ ތެރެއިން ރާއްޖޭގައި މިހައިތަނަށް ބޭއްވުނު ހުރިހާ އިންތިހާބެއްގައި ވެސް ދެވަނަ ބުރަކަށް ގޮސްގެން ނޫނީ އިންތިހާބު ކާމިޔާބު ކުރެވިފައެއް ނުވެއެވެ.
ރައީސް ނަޝީދު އިސްލާހުތަކެއް ހުށަހަޅުއްވައިފައި މި ވަނީ މިހާރު ގާނޫނު އަސާސީ އޮތް ގޮތުން ދެން އެމްޑީޕީއަށް ވެރިކަން ނުލިބޭނެކަމަށް ވިދާޅުވުމަށް ފަހުއެވެ. އެންމެ ފަހުން ބޭއްވި ކޮމަންޑޫ ދާއިރާގެ އިންތިހާބަށްފަހު ވެސް ނަޝީދު ވަނީ މިހާރު މިއޮތް ނިޒާމުގެ ތެރެއިން ދެން އެމްޑީޕީއަށް ވެރިކަން ލިބުން އުނދަގޫވާނެކަމަށް ވިދާޅުވެފައެވެ.
މީގެ އިތުރުން މިހާރު ގާނޫނު އަސާސީގައި ބުނެފައި އޮންނަ ރިޔާސީ ނިޒާމު ބަދަލުކުރަން ނަޝީދު މަސައްކަތް ކުރައްވާތާ ދުވަސްތަކެއް ވެއްޖެއެވެ. އަދި މިއަހަރުގެ ފަހުކޮޅު މިކަމަށް ޓަކައި ފެންނަ ނުފެންނަ ވޯޓަކަށް ދާނެކަމަށް ވެސް ނަޝީދު މީގެ ކުރިން ވަނީ ވިދާޅުވެފައެވެ.
އެންމެ ފަހުން ނިޒާމީ ވޯޓެއް ނެގީ 2007ވަނަ އަހަރުއެވެ. އޭރު ވެސް ރައީސް ނަޝީދު ތާއީދު ކުރެއްވީ ބަރުލަމާނީ ނިޒާމަށެވެ. އެހެން ނަމަވެސް އޭރު ރައްޔިތުންގެ އަގުލަބިއްޔަތު ވޯޓު ދީފައިވަނީ ރާއްޖޭގައި ރިޔާސީ ނިޒާމެއް އޮންނަން ފެންނަކަމަށެވެ.
އެމްޑީޕީގެ ގައުމީ މަޖިލިސް މިރޭ ބޭއްވުމަށް ނިންމައިފައި ވަނީ އިސްކަންދަރު ސްކޫލުގައެވެ. އެ ބައްދަލުކުރެއްވުމުގައި ރިޔާސީ ކެނޑިޑޭޓް ކަނޑައެޅުމުގެ ވޯޓު ބާއްވާނެ ދުވަހެއް ކަނޑައެޅުމުގެ އިތުރުން ގިނަ ނިންމުންތަކެއް ނިންމަން ވަނީ އެޖެންޑާކޮށްފައެވެ.
ފުރަތަމަހަދަންޖެހޭޤާނޫނަކީ ޤާޒީންނާއިޕޮލިހުންގެސަބަބުން ާ ދޫވާ ޑުރަގުމީހުން ހިފެހެއްޓޭނނެގޮތަކަށްު ޤާނޫނިބައްޓަންކުރުން