"ދެން ކޮންމެ ރައްޔިތަކު ވެސް ސުވާލު ކުރާނީ ފުލުހުންގެ ކެމެރާ ކޮބައިތޯ؟"

ދެން ކޮންމެ ކަމެއް ދިމާވާއިރު ރައްޔިތުން ސުވާލު ކުރާނީ ފުލުހުންގެ ބޮޑީވޯން ކެމެރާ ކޮބައިތޯ ކަމަށާއި އެހެންކަމުން ކޮންމެ ފުލުހެއްގެ ޔުނީފޯމުގައި ކެމެރާ ހަރުކުރުން މުހިންމު ކަމަށް ހޯމް މިނިސްޓަރު ޝައިހް އިމްރާން އަބްދުﷲ ވިދާޅުވެއްޖެއެވެ.

Ads by MWSC

ފުލުހުންގެ ބޮޑީވޯން ކެމެރާ ޕްރޮގުރާމް އިފްތިތާހު ކުރުމަށް އާދިއްތަ ދުވަހު ހެނދުނު ރަސްމިއްޔާތެއް ބޭއްވިއިރު މި ޕްރޮގުރާމް ފެށީ 200 ކެމެރާއާ އެކުއެވެ. އެހެންކަމުން ބޮޑީވޯން ކެމެރާ ފުރަތަމަ ބޭނުންކުރާނީ މާލެއާއި އައްޑޫ ސިޓީގައި ކުރިއަށް ގެންދާ ހާއްސަ އޮޕަރޭޝަންތަކާއި މުޒާހަރާތަކާއި އެހެން ވެސް ފުލުހުން ހަރަކާތްތެރިވާ ތަންތަނުގައެވެ.

އާދިއްތަ ދުވަހުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު އިމްރާން ވިދާޅުވީ ފްރަންޓްލައިންގައި މަސައްކަތްކުރާ ހުރިހައި ފުލުހުން އަދި ތިބޭނީ ކެމެރާ އަޅައިގެން ނޫން ކަމަށެވެ. ކުރިއަށް އޮތް ތަނުގައި ކެމެރާގެ އަދަދު އިތުރުކުރާނެކަން ފާހަގަކުރައްވައި މިނިސްޓަރު ވިދާޅުވީ އޭރުން ކެމެރާ ނާޅައި އެއްވެސް ފުލުހަކު ފްރަންޓްލައިނަށް ނުވަތަ އޮޕަރޭޝަނަށް ނުނިކުންނާނެ ކަމަށެވެ.

"މިއަދު ވެސް އަޅުގަނޑުމެންނަށް 200 ކެމެރާއާ އެކު ފަށައިގަނެވުނުއިރު ވެސް ކޮވިޑުގެ ދަތި ހާލަތާ އެކުގައި ރާއްޖެއަށް ދިމާވެފައިވާ އިގްތިޞާދީ ދަތިކަމާ އެކުގައި މި ހިސާބަށް މިކަން ގެނެސްދެވުމަކީ ސަރުކާރުން ނެންގެވި ވަރަށް ހިތްވަރުގަދަ ފިޔަވަޅެއް" ތިން އަހަރުގެ މަސައްކަތަށް ފަހު އިފްތިތާހުކުރެވުނު ޕްރޮގުރާމާ ގުޅޭގޮތުން އިމްރާން ވިދާޅުވިއެވެ.

ޕޮލިސް ރިފޯމްކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން ބޮޑީވޯން ކެމެރާ ޕްރޮގުރާމްގެ މަޝްވަރާތައް ފަށައިގަތްއިރު ޕޮލިސީ ސެކެޓްރީގެ ގޮތުގައި ހުންނަވައި މިހާރުގެ ޓެކްނޮލޮޖީ މިނިސްޓަރު އައިމިނަތު ޝައުނާ ކުރެއްވި މަސައްކަތަށް އިމްރާން ޝުކުރު އަދާކުރެއްވިއެވެ. އަދި މި ޕްރޮގުރާމް ފަށައިގަނެވިގެންދާ އިރު ޝައުނާ ކަމާ ބެހޭ ވުޒާރާގައި އިންނެވުމަކީ ފުލުހުން ރިފޯމް ކުރުވުމަށް އޭނާ ދެއްވާ އަހަމިއްޔަތުކަން ކަމަށް ވެސް އިމްރާން ވިދާޅުވިއެވެ.

ބޮޑީވޯން ކެމެރާ ޕްރޮގުރާމް އިފްތިތާހު ކުރުމަށް ބޭއްވި ރަސްމިއްޔާތުގެ ތެރެއިން

ބޮޑީވޯން ކެމެރާ ޕްރޮގުރާމް ފަށައިގަތުމަށް ސަރުކާރުން ބޮޑު ހޭދައެއް ކޮށްފައިވާކަން ފާހަގަކުރައްވަމުން އިމްރާން ވިދާޅުވީ މިކަމުން ދޭހަކޮށްދެނީ ރައްޔިތުންގެ ރައްކާތެރިކަމަށް ސަރުކާރުން ދޭ އަހަމިއްޔަތުކަން ކަމަށެވެ.

"އަޅުގަނޑު ޔަގީންކުރަނީ މި ޕްރޮޖެކްޓުގެ ސަބަބުން އިރާދަކުރެއްވިއްޔާ ކުރިއަށް އޮތް ދުވަސްތަކުގައި އަޅުގަނޑުމެން ރައްޔިތުންނަށް ލިބިގެންދާ ހިދުމަތްތަކުގައި މުހިންމު ފައިދާތަކެއް ކުރާނެކަމަށް" އިމްރާން ވިދާޅުވިއެވެ.

ބޮޑީވޯން ކެމެރާއަކީ ދުނިޔޭގެ ތަރައްގީ ބައެއް ގައުމުތަކުގައި މިހާރު ވެސް ކާމިޔާބުކަމާ އެކު ބޭނުންކުރަމުންދާ ވަސީލަތެކެވެ. މި ކެމެރާއިން ރެކޯޑުކުރެވޭ ވީޑިއޯ ޝަރީއަތުގެ މަޖިލީހުގައި ހެކީގެ ގޮތުގައި ވެސް ބަލައިގަނެއެވެ. ހާއްސަކޮށް މުޒާހަރާ ފަދަ ތަންތަނުގައި ފުލުހުން ހަރަކާތްތެރިވާގޮތުން މޮނީޓާ ކުރުމަށް މި ހިދުމަތުގެ ސަބަބުން ކުރިއެރުންތަކެއް ވަނީ ހޯދިފައެވެ.