ފާދިއްޕޮޅަށް ރައީސް ޞާލިޙް ކުރެއްވި ދަތުރުފުޅު ނިންމަވައިލައްވައިފި
ފާދިއްޕޮޅުގެ 6 ރަށަކަށް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ކުރެއްވި ދަތުރުފުޅު މިއަދު ނިންމަވައިލައްވައިފިއެވެ.
މި ދަތުރު ފުޅުގައި އެމަނިކުފާނު ވަނީ ޅ. މަޑިވަރާއި ހިންނަވަރާއި ފެލިވަރު އަދި ނައިފަރާއި އޮޅުވެލިފުށީގެ އިތުރުން ކުރެންދުއަށް ވަޑައިގެންފައެވެ. އަދި ރަށްރަށުގެ ރަށްޔިތުންނާއި ރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާ ބައްދަލުކުރައްވާ މަޝްވަރާކުރައްވައިފައި ވެއެވެ. މީގެ އިތުރުން އެމަނިކުފާނު ވަނީ ރަށްރަށުގައި ހުރި ސަރުކާރު މުއައްސަސާތަކަށް ޒިޔާރަތްކުރައްވައި އެ ތަންތަނުގެ ހާލަތު ބައްލަވައިލައްވައި ތަރައްޤީގެ ބައެއް މަޝްރޫޢުތައް ކުރިޔަށްދާގޮތް ބައްލަވައިލައްވައިފައެވެ.
މި ދަތުރުފުޅުގައި ރައީސް ވަނީ ޅ. މަޑިވަރުގައި ތަރައްޤީކޮށްފައިވާ އެއަރޕޯޓް ރަސްމީގޮތުން ހުޅުވައިދެއްވައިފައެވެ. މަޑިވަރު އެއަރޕޯޓް ހުޅުވުމުގެ ރަސްމިއްޔާތުގައި ރައީސް ދެއްކެވި ވާހަކަފުޅުގައި ލާމަރުކަޒީ ނިޒާމުން ރާއްޖޭގެ ރަށްތައް ތަރައްޤީކުރުމުގައި އެއްރަށުން އަނެއް ރަށަށް ދަތުރުފަތުރުން ގުޅުވައިލުމަކީ މުހިންމު މަސައްކަތެއްކަން ފާހަގަ ކުރައްވައި، މަޑިވަރުގައި ހުޅުވުނު އެއަރޕޯޓާ އެކު، މާލެއިން އުތުރުގެ ކޮންމެ އަތޮޅެއްގައި މިހާރު އެއަރޕޯޓެއް ޤާއިމުކުރެވިއްޖެކަން ފާހަގަކުރެއްވިއެވެ.
ރައީސްގެ މި ދަތުރުފުޅުގައި މަދަރުސަތުލް އިފްތިތާޙްގައި އަލަށް އިމާރާތްކުރި 10 ކްލާސްރޫމާއި އޭވީ ރޫމާއި ސްޓާފްރޫމް ހިމެނޭ އިމާރާތް ރަސްމީގޮތުން ހުޅުވައިދެއްވުމުގެ އިތުރުން ޅ. ނައިފަރުގައި އިމާރާތްކޮށްފައިވާ 100 ހައުސިންގ ޔުނިޓްގެ މަސައްކަތް ނިންމައި ނައިފަރު ކައުންސިލާ ހަވާލުކުރުމުގެ ރަސްމިއްޔާތު ޝަރަފުވެރިކޮށްދެއްވައިފައިވެއެވެ.
ފާދިއްޕޮޅުގެ 6 ރަށަކަށް ރައީސް ކުރެއްވި ތިން ދުވަހުގެ މި ދަތުރުފުޅުގައި އެމަނިކުފާނުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގެންނެވިއެވެ.
