ޔޫކްރެއިންގައި ތިބި 15 ދިވެހި ދަރިވަރަކު ހަންގޭރީއަށް
ޔޫކްރެއިންގެ ހުޅަނގުގައި އޮންނަ އިވަނޯގައި ތިބި 15 ދިވެހިން ހަންގޭރީއަށް އެއްގަމު މަގުން ގެންގޮސްފައިވާ ކަމަށް ފޮރިން މިނިސްޓްރީން ވިދާޅުވެއްޖެއެވެ.
އެ މިނިސްްޓްރީން މިއަދު ބުނީ، އެ 15 ދިވެހިން ހަންގޭރީއަށް ގެންގޮސްފައި ވަނީ، އެ ތަނުން އަނބުރައި ރާއްޖެއަށް އެމީހުން ގެނައުމަށް ކަމަށެވެ.
ޔޫކްރެއިންގައި ހިނގަމުންދާ ކަންކަމުގެ އެންމެ ފަހުގެ އަދާހަމަ ދެއްވަމުން ފޮރިން މިނިސްޓްރީން ވިދާޅުވީ، ޔޫކްރެއިންގެ ހުޅަނގުގައި އޮންނަ އިވަނޯގައި ތިބި 15 ދިވެހިން ހަންގޭރީ އަށް އެއްގަމު މަގުން ގެންގޮސް، ދިވެހިރާއްޖެއަށް ގެނައުމުގެ މަސައްކަތް ކުރަމުންދާ ކަމަށެވެ.
"ދަރިވަރުން މިހާރު ދަތުރުކުރަމުން ދަނީ ޔޫކްރެއިން-ހަންގޭރީ ސަރަހައްދީ ރޮނގު ކައިރިއަށް. ރެއިން ފެށިގެން ފޮރިން މިނިސްޓްރީއާއި ބަރލިންގައި ހުންނަ ދިވެހި އެމްބަސީއިން މިދަނީ ހަންގޭރީ ސަރުކާރާ އެކު، ދިވެހިން ރައްކާތެރި ހިސާބުތަކަށް ގެންދިޔުމަށް މަސައްކަތްކުރަމުން." އެ މިނިސްޓްރީން ވިދާޅުވިއެވެ.
މީގެ އިތުރުން ޔޫކްރެއިންގެ ހަރްކީވްގައި ތިބި ދިވެހިންނާއި، ނިޕްރޯގައި ހުރި ދަރިވަރު ވެސް ހަންގޭރީ މަގުން އަނބުރައި ރާއްޖެއަށް ގެނެވޭތޯ މަސައްކަތް ކުރަމުންދާ ކަަމަށް ވެސް ފޮރިން މިނިސްޓްރީން ވިދާޅުވިއެވެ.
ފޮރިން މިނިސްޓްރީން ވިދާޅުވީ، ޔޫކްރެއިންގައި ތިބި ހުރިހާ ދިވެހިންގެ ހާލު ވެސް ރަނގަޅު ކަމަށެވެ.
