ޔޫކްރޭންގެ އެތައް ސަތޭކަ ބަޔަކު ނިކުމެ ޕެޓްރޯލް ބޮން ތައްޔާރުކުރަނީ!
ޔޫކްރޭންގެ ދެކުނުގައި އޮންނަ ނީޕްރޯގެ އެތައް ސަތޭކަ ރައްޔިތުން ނިކުމެ ހަނގުރާމައިގައި އެހީތެރިވުމުގައި ހަރަކާތްތެރި ވާން ފަށައިފިއެވެ.
ބޭރުގެ މީޑިއާތައް ރިޕޯޓްކޮށްފައިވާ ގޮތުގައި އެންމެ ގިނަ ބަޔަކު ހަރަކާތްތެރިވަމުން ދަނީ ޕެޓްރޯލް ބޮން ތައްޔާރުކުރުމުގައެވެ. މި މަސައްކަތް ދައްކައިދޭ ވީޑިއޯތަކުން ފެންނަ ގޮތުގައި ފެކްޓްރީއެއް ފަދައިން އެތައް ސަތޭކަ ބަޔަކު ދަނީ ޔޫކްރޭންގެ ޑިފެންސް މިނިސްޓްރީން ކިޔައިދީފައިވާ ރެސިޕީއާ އެއްގޮތަށް އެތަކެތި ހެދުމުގައި މަޝްޣޫލްވަމުންނެވެ.
މީގެ އިތުރުން އާންމުން ދަނީ އެމީހެއްގެ އަތުގައިވާ ހުރި އެއްޗެއްގެ ތެރެއިން ބޭނުން ޖެހިދާނެ އެއްޗެއް ވެއްޖިއްޔާ ފޯރުކޮށްދެމުންނެވެ. އެގޮތުން ފެނާއި ކާނާއާއި ރަޖާ އަދި ބާލީސް ފަދަ ތަކެތި އެ މީހުން ގެންދަނީ ބޭނުން ޖެހިފައިވާ ފަރާތްތަކަށް ދިނުމަށް ޓަކައި ޖަމާކުރަމުންނެވެ.
ޔޫކްރޭންގައި މިހާރު މާޝަލް ގާނޫން ހިންގައިފައިވާތީ 18އަހަރާއި 60އަހަރާ ދެމެދުގެ މީހުން ގައުމުން ބޭރުވުން ވަނީ މަނާކޮށްފައެވެ. އެހެންކަމުން އެ އެންމެން ދަނީ ހަނގުރާމައިގެ އަމަލީ މައިދާނުގައްޔާއި އެހެނިހެން އެކިއެކި ކަންކަމުގައި ހަރަކާތްތެރިވަމުންނެވެ.
ރަޝިއާގެ އަސްކަރިއްޔާއިން މިހާރު ވަނީ ވެރިރަށް ކިޔޭވް ވަށައިލައިފައެވެ. މީގެ އިތުރުން ޔޫކްރޭންގެ އެތައް ސަރަހައްދަކަށް ރަޝިޔާ ސިފައިން ވަނީ އަރައިފައެވެ. ޔޫކްރޭންގެ އަސްކަރިއްޔާ ބަލިކުރުމަށް ރަޝިއާއިން ކުރާ މި ހަނގުރާމައާ ގުޅިގެން ޔޫކްރޭންގެ ރައީސް ޒެލެންސްކީ އެންމެ ފަހުން ވެސް ބުނެފައި ވަނީ ރަޝިއާގެ މައްޗަށް ހޯދާނެ ކަމަށެވެ.
