ޔޫކްރޭން ހަނގުރާމަ: ހޮސްޕިޓަލެއްގެ ބޭސްމަންޓްގައި މީހަކު ވިހައިފި
ހަނގުރާމަ ހިނގަމުންދާ ޔޫކްރޭންގެ ހޮސްޕިޓަލެއްގެ ބޭސްމަންޓްގައި އަންހެނަކު ވިހައިފިއެވެ.
ޚަބަރުތައް ބުނާ ގޮތުގައި ހަނގުރާމަ ހިނގަމުންދާ ޔޫކްރޭންގެ ލުހަންސްކްގެ ހޮސްޕިޓަލަކަށް މި އަންހެން މީހާ ، ވިހަން ދިޔައީ މިދިޔަ ހުކުރު ދުވަހުއެވެ. އަދި ރައްކާތެރިކަމާ އެކު އޭނާއަށް ވިހެއުމުގެ ފުރުސަތު ހޯދައިދިނުމަށް އެ ހޮސްޕިޓަލްގެ ސްޓާފުން ވަގުތުން ، ހޮސްޕިޓަލްގެ ބޭސްމަންޓްގައި ވަގުތީ ލޭބަރ ރޫމެއް ހެދިއެވެ.
އެ ހޮސްޕިޓަލުން ބުނެފައި ވަނީ ހޮސްޕިޓަލާ ޖެހިގެން ހުރި އިމާރާތަކަށް ވެސް ރަޝިއާ ސިފައިން އޭރު ބޮން އަޅަމުން ގެންދިޔަ ކަމަށެވެ.
"އަލަށް ދުނިޔެއަށް އައުމަށް އެންމެ އެކަށީގެންވާ ޙާލަތަށް ވުރެ މާ ދުރު ޙާލަތެއްގައި ، ހޮސްޕިޓަލްގެ ބޭސްމަންޓްގައި ، އިވިގެން އެ ދިޔައީ އަލަށް އުފަންވި ފިރިހެން ކުއްޖެއްގެ ރުއިމުގެ އަޑު" ހޮސްޕިޓަލުން ބުނެފައި ވެއެވެ.
ރަޝިއާގެ އަސްކަރިއްޔާއިން ޔޫކްރޭނަށް އަރައި މިހާރު ކުރަމުންގެންދާ ހަނގުރާމައިގައި ޔޫކްރޭންގެ އާއްމުންގެ 200އެއްހައި މީހުން މިހާރު ވަނީ މަރުވެފައެވެ. އަދި ދެލައްކައެއްހައި މީހުން ގެދޮރުދޫކޮށް ރައްކާތެރި ހިސާބުތަކަށް ހިޖުރަކޮށްފައިވާ އިރު އެތައް ސަތޭކަ ބަޔަކު ވަނީ ދާނެ ތަނެއް ނެތި މަގުމަތިވެފައެވެ. ފިހާރަތަކުން ކާނާ ހުސްވަމުންދާއިރު އޭޓީއެމްތައް ވެސް ހުރީ މަސައްކަތް ނުކުރާ ޙާލަތުގައެވެ.
