ދުޝްމަނުންނަށް އޮޅުވައިލާން ، ޔޫކްރޭންގެ މަގުތަކުގެ ސައިންބޯޑުތައް ބަދަލުކުރަނީ
ރަޝިއާގެ އަސްކަރިއްޔާއިން ޔޫކްރޭނަށް އަރައި ، އާންމުންނަށާއި ތަންތަނަށް ގެއްލުންދޭތީ އެމީހުންނަށް އޮޅުވައިލުމަށް ޓަކައި ޔޫކްރޭންގެ މަގުތަކާއި ސިޓީތަކުގެ ސައިންބޯޑްތަކާއި ނަން ބޯޑުތައް ބަދަލުކުރަން ނިންމައިފިއެވެ.
ޔޫކްރޭންގެ ރޯޑް ސައިން ކޮމްޕެނީގެ މަގުތައް ބެލެހެއްޓުމުގެ ޒިންމާ މަތިކުރެވިފައިވާ އިސްވެރިޔާ އުކްރަވްޑޯއާ ހަވާލާދީ ބޭރުގެ މީޑިއާތަކުން ބުނެފައި ވަނީ މަގުތަކުގެ ސައިން ބޯޑްތައް ނަގައި ،"އަނބުރާ ރަޝިއާއަށްދޭ" ފަދަ ލިޔުންތަކުގެ ބޯޑް ހަރުކުރުމުގެ މަސައްކަތް މިހާރު ކުރިއަށްދާ ކަމަށެވެ.
އުކްރަވްޑޯ ބުނެފައި ވަނީ ރަޝިއާގެ ސިފައިންގެ ކޮމިޔުނިކޭޝަން ފެންވަރު ވަރަށް ދަށް ކަމަށާއި އެފަދައިން ކަންކަން ކުރުމުން އެމީހުންނަށް ތަންތަން ދެނެގަންނާން އުނދަގޫ ވާނެ ކަމަށެވެ.
ސައިން ބޯޑް ކޮމްޕެނީއިން ވަނީ ކައިރި ސިޓީތަކަށް ދާން އޮންނަ މަގުދައްކައިދޭ ބޯޑެއްގެ ބަދަލުކޮށްފައިވާ ފޮޓޯއެއް ވެސް މީޑިއާގައި ހިއްސާކޮށްފައެވެ.
ޔޫކްރޭންގެ ޑިފެންސް މިނިސްޓްރީން ވަނީ މި ނިންމުމަށް ތާއީދުކޮށް ، ރަޝިއާގެ ފައުޖުތަކަށް ފަސޭހަވާނެ އެއްވެސް ބޯޑެއް ހުރި ނަމަ ، އެ ބޯޑެއް ނެގުމަށް ނުވަތަ ބަދަލުކުރުމަށް އާންމުންނަށް ގޮވައިލައިފައެވެ.
"ނުގަވާއިދުން ޔޫކްރެއިނަށް ވަދެ ، އެކި ހިސާބުތަކަށް ފެތުރެމުންދާ ރަޝިއާގެ ސިފައިންނަށް އޮޅުވައިލައި ބައިބައިކޮށްލުމަށް ޓަކައި މަގުތަކާއި ސިޓީ އަދި ވިލެޖުތަކުގެ ބޯޑްތައް ނެގުމަށް ހުރިހައި ރައްޔިތުންނަށް ގޮވައިލަން"ޑިފެންސް މިނިސްޓްރީން ވިދާޅުވިއެވެ.
