"ނޯ ވޯރ" ޓީޝާޓް ނުލި ކުޅުންތެރިއަކަށް ފާޑުކިޔުމާއި ތަޢުރީފް!
ރަޝިއާއިން ޔޫކްރޭންގެ މައްޗަށް ދައްކަމުންދާ ގަދަދެއްކުމާއި، ހިނގަމުންދާ ހަނގުރާމައާ ދެކޮޅުކަން އަންގައިދިނުމުގެ ގޮތުން ތުރުކީ ލީގު މެޗެއްގައި ކުޅުންތެރީން ހިންގި ހަރަކާތުގައި ބައިވެރިނުވި ކުޅުންތެރިއަކަށް ފާޑު ކިޔުމާއި ތައުރީފް ލިބެމުން އެބަދެއެވެ.
ތުރުކީ ލީގުގައި އަންކަރަގުޖޫއާއި އެރިޒުރުމްސްޕޯރ މިދިޔަ އާދީއްތަ ދުވަހު ބައްދަލުކުރި މެޗުގެ ކުރީން ދެ ޓީމްގެ ކުޅުންތެރީން ވަނީ "ނޯ ވޯރ" ޖަހައިފައިވާ ޓީޝާޓެއް ލައިގެން ޝުއޫރުފާޅުކޮށްފައެވެ. ނަމަވެސް އެރިޒުރުމްސްޕޯރގެ ކެޕްޓަން,ޑިފެންޑަރ އައިކުތު ދިމިރު ވަނީ ޓީޝާޓް ލާން ދެކޮޅު ހަދައިފައެވެ.
ތުރުކީ ގައުމީ ޓީމަށް ވެސް އެއް މެޗު ކުޅެފައިވާ 31 އަހަރުގެ އައިކުތު މިކަމާ ގުޅިގެން ބުނެފައި ވަނީ ހަނގުރާމައިގެ ސަބަބުން މެދުއިރުމަތީގެ ގައުމުތަކުގައި ކޮންމެ ދުވަހަކު ވެސް އެތައް ސަތޭކަ ބަޔަކު މަރުވާ ކަމަށާއި ނަމަވެސް އެކަންކަން ކުށްވެރިކޮށް އެފަދަ ހަރަކާތްތައް ނުބާއްވާ މީހުން ، ޔޫރަޕްގެ ގައުމަކަށް މިކަން ދިމާވުމުން މިފަދަ ކަންކަން ކުރާ ކަމަށެވެ.
އައިކުތުގެ މި އަމަލާ ގުޅިގެން އޭނާއަށް ވަރަށް ގިނަ ފާޑުކިޔުން އަމާޒުވި ނަމަވެސް ގިނަ ބަޔަކު ވަނީ އޭނާއަށް ތައުރީފްކޮށްފައެވެ. އެގޮތުން ޔޫރަޕްގެ "ޑަބަލް ސްޓަންޑާޑް" ހުރިހައި ކަމަކުން ވެސް ފެންނަމުންދާ ކަމަށް ޚިޔާލު ފާޅުކުރި މީހުން ބުނެފައި ވެއެވެ.
