"ޑިމޮކްރަޓިކް ދުޅަހެޔޮ ކެމްޕެއިނަކުން ކާމިޔާބު ހޯދުމުގައި ދެމި ތިއްބަވާ"
ދެބަސްވުމާއި ނުނިޔަތުން އެކަހެރިވެ، ޑިމޮކްރަޓިކް ދުޅަހެޔޮ ކެމްޕެއިނަކުން ކާމިޔާބު ހޯދުމުގައި ދެމި ތިބުމަށް އެމްޑީޕީގެ ޗެއާޕާސަންކަމަށް ވާދަކުރައްވާ ފައްޔާޒު އިސްމާއީލްގެ ކެމްޕެއިން "ހިންގާލަން"ޓީމްގެ ސަޕޯޓަރުންނަށް އިލްތިމާސްކޮށްފިއެވެ.
ފައްޔާޒުގެ ކެމްޕެއިނު ޓީމުން މިރޭ ނެރުނު ބަޔާނެއްގައި ބުނެފައި ވަނީ އެމްޑީޕީގެ މެންބަރުންނަކީ ވާދަވެރި ސިޔާސީ ނިޒާމަކަށް ފަރިތަ އަދި އެއްބަސްވުމަށް ޓަކައި ދެ ބަސްވުމުގެ ތެރެއިން ޕާޓީއާއި ގައުމަށް އެ ވަގުތަކަށް އެންމެ ލާބަހުރި ގޮތެއް ހޯދުމުގެ މޭސްތިރިން ކަމަށެވެ.
"ހިންގާލަން" ކެމްޕެއިނު ޓީމުން އިތުރަށް ބުނީ، އެ ޓީމަށް އަމާޒުވާ އަމާޒުވުންތައް ތަހައްމަލުކޮށް ކުރާ މުއާމަލާތްތަކުގައި ރިވެތި އަހުލާގާ އެކު ކެތްތެރިކަން އިސްކުރަމުންދާތީ އެމްޑީޕީ ހިންގާލަން ކުރަމުންދާ ކެމްޕެއިންގެ ހުރިހާ މެންބަރުންނަށް ޝުކުރު ދަންނަވާ ކަމަށެވެ.
"ކުރިއަށް އޮތް ތަނުގައި ވެސް ދެ ބަސްވުމާއި ނުނިޔަތުން އެކަހެރިވެ ޑިމޮކްރަޓިކް ދުޅަހެޔޮ ކެމްޕޭނަކުން ކާމިޔާބު ހޯދުމުގައި ދެމި ތިބުމަށް އިލްތިމާސް ކުރަމެވެ. މިއަދު ދެކެން ޖެހޭ މަންޒަރަކީ ހުރިހައި ފަރާތްތަކާ އެކު ގުޅިގެން އެމްޑީޕީ ބާރަށް ހިންގައިލެވޭ ދުވަހުގެ އުފާވެރި މަންޒަރެވެ." ކެމްޕެއިނު ޓީމުގެ ބަޔާނުގައިވެއެވެ.
އެމްޑީޕީ ދެ ފެކްޝަނަކަށް މިހާރު ބެހިފައިވާ އިރު، ފައްޔާޒުގެ ކެމްޕެއިން ޓީމުން މި ފަދަ ބަޔާނެއް ނެރެފައި މި ވަނީ ، އެމްޑީޕީގެ އެތެރޭގެ އިންތިހާބާ ދިމާކޮށް ބައެއް މީހުން ވަޒީފާތަކުން ވަކިކުރާ ކަމަށް ބުނެ ރައްޔިތުންގެ މަޖިލީހުގެ މިއަދުގެ ޖަލްސާއަށް އުނގޫފާރު ދާއިރާގެ މެންބަރު މުހައްމަދު ވަހީދު ހުށަހެޅުއްވި ކުއްލި މައްސަލައިގައި އެމްޑީޕީގެ މެންބަރުން ބައިބައިވެ ވަރުގަދަ ބަހުސެއް ކުރައްވައިފައި ވަނިކޮށެވެ.
