އިންޑިއާ، ލަންކާ، ބަނގްލަދޭޝް، ޗައިނާ ވަކިކޮޅަކަށް ނުޖެހޭ، ރާއްޖޭން ވޯޓް ދިނީ ރަޝިޔާއާ ދެކޮޅަށް
ރަޝިއާގެ ސިފައިން ޔުކްރެއިނަށް އަރައި ދެމުން ގެންދާ ހަމަލާތައް ކުށްވެރި ކުރުމަށް، ރަޝިއާގެ ސިފައިން ޔުކްރެއިން ވަގުތުން ފޭބުމަށް ގޮވައިލައި އދ.ގެ އާންމު މަޖިލީހުގައި ރޭ ނެގި ވޯޓުގައި 141 ގައުމަކުން ރަޝިޔާއާ ދެކޮޅަށް ވޯޓް ދީފިއެވެ.
ރަޝިޔާއާ ދެކޮޅަށް ވޯޓް ދިން ޤައުމުތަކުގެ ތެރޭގައި ރާއްޖެ ހިމެނެއެވެ.
ރަޝިޔާއާ ދެކޮޅު ނުވެ، ވަކި ގޮތަކަށް ވޯޓް ނުދޭން 35 ޤައުމަކުން ވަނީ ނިންމައިފަައެވެ. އޭގެ ތެރޭގައި، އަވައްޓެރި ބައެއް ޤައުމުތައް ވެސް ހިމެނެއެވެ. ރަޝިޔާއާ ދެކޮޅަށް ވޯޓް ނުދޭން ނިންމައިފައިވާ ބައެއް ޤައުމުތަކަކީ، އިންޑިއާ، ލަންކާ، ބަނގްލަދޭޝް އަދި ޗައިނާއެވެ. މީގެ އިތުރުން، އިރާޤާއި އީރާން ވެސް ވަކި ކޮޅަކަށް ވޯޓެއް ނުދެއެވެ.
މި ޤަރާރާ ދެކޮޅަށް ވޯޓް ދީފައި ވަނީ ފަސް ޤައުމަކުންނެވެ އެީ ރަޝިއާގެ އިތުރުން ބެލަރޫސް، އުތުރު ކޮރެއާ، އެރިތުރިއާ އަދި ސީރިއާއެވެ.
އާއްމު މަޖިލީހަށް ހުށަހަޅައިފައިވާ ގަރާރަކީ ގާނޫނީ ގޮތުން އަމަލު ކުރުން މަޖުބޫރު ގަރާރެއް ނޫނެވެ. ނަމަވެސް ގަރާރު ފާސްވުމުން ރަޝިއާއަށް ކުރިމަތިވެފައިވާ ފިއްތުން އިތުރުވާނެއެވެ.
