ރަޝިޔާގެ އަސްކަރިއްޔާއާ ގުޅޭ ގޮތުން ދޮގު ޚަބަރު ފަތުރާ ނަމަ 15 އަހަރުގެ ޖަލު ހުކުމެއް
ޔޫކްރެއިންގައި މޮސްކޯއިން ކުރަމުންދާ ހަނގުރާމައިގައި އަސްކަރީ ފައުޖުތަކާ ބެހޭ ގޮތުން ގަސްދުގައި ދޮގު މައުލޫމާތު ފަތުރައިފި ނަމަ 15 އަހަރުގެ ޖަލު ހުކުމެއް އަންނަ ގޮތަށް ގާނޫނެއް ފާސްކޮށްފިއެވެ.
ރަޝިއާގެ ޕާލަމެންޓުން މިއަދު މިފަދަ ޤާނޫނެއް ފާސްކޮށްފައި ވަނީ، ރަޝިޔާގައި ބައެއް ފަރާތްތަކުން ހުޅަނގުގެ ޤައުމުތަކާ ގުޅިގެން ދޮގު މައުލޫމާތު ފޯރުކޮށްދެމުން އަންނަ ކަމަށް ބުނެއެވެ.
"ރަޝިޔާގެ ދުޝްމަނުން ކަމަށްވާ އެމެރިކާއާއި އެ ގައުމުގެ އެކުވެރި ގައުމުތަކުން ދަނީ ދޮގު މައުލޫމާތު ފަތުރަމުން. އެގޮތަށް މައުލޫމާތު ފަތުރަނީ، ރަޝިޔާ ރައްޔިތުންގެ މެދުގައި ފިތުނަ ފަސާދަ އުފައްދައި، އެގައުމުގެ ރައްޔިތުން ބައިބައިކުރުމުގެ މަގުސަދުގައި" ރަޝިއާގެ ގާނޫނު ހަދާ މަޖިލީހުގެ ތިރިގެއިން ނެރުނު ބަޔާނެއްގައި ވިދާޅުވިއެވެ.
"ފޭކް ޚަބަރުތަކުގެ ސަބަބުން ސީރިއަސް ނަތީޖާތަކެއް ނިކުމެއްޖެ ނަމަ ދެން 15 އަހަރު ދުވަހުގެ ޖަލު ހުކުމެއް އިއްވުގެ ބާރު ލިބިދެން،"
މި ގާނޫނުގެ ސަބަބުން ރަޝިއާގެ ދައުލަތަށް ސިފައިންގެ އިތުބާރު ގެއްލޭ ފަދަ ވާހަކަތަކެއް ކަމަށް އޮފިޝަލުން ދެކޭ ވާހަކަ ފަތުރާ ފަރާތްތަކާ ދެކޮޅަށް، ހަރުކަށި ފިޔަވަޅު އެޅުމަށް ރަޝިއާގެ ދައުލަތަށް މިހާރަށް ވުރެ ވަރުގަދަ ބާރުތަކެއް ލިބިދެއެވެ.
ހުޅަނގުން ގެންދަނީ މި ހަނގުރާމައިގައި ރަޝިޔާއިން ދޮގު ޚަބަރު ފަތުރާ ކަމަށް ތުހުމަތު ކުރަމުންނެވެ. މިގޮތުން ރަޝިޔާގެ ސަރުކާރުގެ ހިއްސާ އޮންނަ އާރުޓީ މީޑިއާ ވަނީ ހުޅަނގުގެ ގިނަ ޤައުމުތަކުގައި ނުފެންނަ ގޮތަށް މަނާކޮށްފައެވެ.
