ރަޝިޔާގައި ކިޔަވަމުން އަންނަ ދަރިވަރުން ރާއްޖެ އަންނަނީ
ރަޝިއާއިން ޔޫކްރެއިނަށް އަރައި ހަނގުރާމަކުރަމުންދާތީ، ރަޝިޔާގައި ކިޔަވަމުން އަންނަ ދަރިވަރުން ރާއްޖެ އައުމަށް ތައްޔާރުވަމުންދާ ކަމަށް މައުލޫމާތު ލިބިއްޖެއެވެ.
"ދެން"އަށް މައުލޫމާތު ދެމުން ރަޝިޔާގައި ކިޔަވަމުން އަންނަ ދަރިވަރަކު ބުނެފައި ވަނީ، ރަޝިޔާގެ ޔުނިވަރސިޓީތައް އޮންލައިން ކުރުމަށް ނިންމައިފައިވާ ކަމަށެވެ.
"ޔުނިވަރސިޓީތަކުން ފުރަތަމަ ބުނީ އޮންލައިންކޮށެއް ކިޔަވައެއް ނުދެވޭނޭ. އެކަމަކު މިދިޔަ އަހަރު ވެސް ޕެންޑަމިކާ ހެދި ކިޔަވައިދިނީ އޮންލައިންކޮށް، އެހެންވީމަ އަހަރެމެން ޕުޝް ކުރީ، ޕެޓިޝަނެއް ހުށަހަޅައިގެން އޮންލައިންކޮށް ކުރިޔަށް ގެންދަން އެއްބަސްވީ" އޭނާ ކިޔައިދިނެއެވެ.
މައުލޫމާތު ލިބިފައިވާ ގޮތުގައި ރަޝިޔާގައި މި ވަގުތު ތިބި 88 ދަރިވަރުންގެ ތެރެއިން 55 ދަރިވަރުން އަންނަނީ ރާއްޖެ އައުމަށް ތައްޔާރުވަމުންނެވެ. ރަޝިޔާ އަދި ބެލާރުސްގައި ތިބި ދަރިވަރުން ރާއްޖެ ގެނައުމަށް މާލީ އެހީތެރިކަން ދެއްވާނެ ކަމަށް ފޮރިން މިނިސްޓްރީން މީގެ ކުރީން ވަނީ ވިދާޅުވެފައެވެ.
ރަޝިޔާގައި ތިބި ގިނަ ދަރިވަރުންނަކީ މެޑިސިން ކިޔަވަމުން އަންނަ ދަރިވަރުންނެވެ.
ރަޝިޔާގައި ތިބި ދަރިވަރުން ރާއްޖެ އައުމަށް ނިންމައިފައިވާ އިރު، ހުޅަނގުގެ ގިނަ ޤައުމުތަކުން ވަނީ ރަޝިޔާއާ ދެކޮޅަށް ވަރުގަދަ ފިޔަވަޅުތަކެއް އަޅައިފައެވެ. އޭގެ ތެރޭގައި ރަޝިޔާގެ ފްލައިޓްތަކަށް އެ ޤައުމުތަކުގެ ވައިގެ ސަރަހައްދު ބަންދު ކުރުން ހިމެނެއެވެ. މިއާ އެކު ރަޝިޔާގެ ބޮޑެތި އެއަރލައިންތަކުން ވަނީ އިންޓަނޭޝަނަލް ގިނަ ފްލައިޓްތައް ހުއްޓައިލައިފައެވެ.
Ads by STO
