އެމްޑީޕީގެ ކަންކަން ހިނގަމުން އަންނަ ގޮތާ މެދު ރޮޒައިނާގެ ކަންބޮޑުވުން
ވެރިކަން ކުރާ މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގައި ކަންކަން ހިނގަމުންދަނީ އެންމެ ރަނގަޅަށް ކަމަށް ގަބޫލު ނުކުރެއްވޭ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
އޮންލައިން ނޫސް "އައްޑޫ ލައިވް"އަށް ދެއްވި ބަސްދީގަތުމެއްގައި ރޮޒައިނާ ވަނީ އަންނަ އޭޕްރީލްމަހުގެ 16 ވަނަ ދުވަހު ބާއްވާ އެމްޑީޕީގެ އެތެރޭގެ އިންތިޚާބުގެ ކެމްޕެއިން ވަރަށް ފޯރީގައި ކުރިއަށް ދިޔަ ނަމަވެސް، ޕާޓީގައި ކަންކަން ހިނގަމުން އަންނަ ގޮތާ މެދު ކަންބޮޑުވުންތަކެއް ހުރިކަން ފާހަގަ ކުރައްވައިފައެވެ.
"ޑިމޮކްރެޓިކް އުސޫލުތަކާ އެއްގޮތަށް ކަންކަން މިވަގުތަކު ނުދޭ. އެއީ އަޅުގަނޑަށް ހީވަނީ ރަނގަޅު ކޮށްލަން ޖެހޭ ކަމެއްހެން." އޭނާ ވިދާޅުވިއެވެ.
އޭނާ ވިދާޅުވީ މައްސަލަ އުފެދެނީ ވަކި އެމްޑީޕީ ވެގެން ނޫން ކަމަށާއި، ކޮންމެ ސިޔާސީ ޕާޓީއެއްގައި ވެސް ރަނގަޅު ކޮށްލަން ޖެހޭ ކަންކަން ހުންނާނެ ކަމަށެވެ.
އެމްޑީޕީގެ ކަންކަން ދޯދިޔާ ވެފައިވާ ކަމަށް ދެކެވަޑައިގަންނަވާ ސަބަބެއްގެ ގޮތުގައި، ރޮޒައިނާ ވަނީ އެޕާޓީގެ ޗެއާޕާސަންއާއި ޕީޖީ އަދި އަންހެނުންގެ ރޫހުގެ ރައީސްގެ ދައުރު ހަމަވެގެން ދިޔައިރު ވެސް، އިންތިޚާބެއް ނުބޭއްވި ދިޔަ ދިޔުން ފާހަގަ ކުރައްވައިފައެވެ.
އެމްޑީޕީގެ އެތެރޭގެ އިންތިޚާބާ ގުޅިގެން، އެ ޕާޓީގެ ދެ ފެކްޝަނުގެ މެދުގައި އުފެދިފައިވާ ކޯޅުން ވަނީ ބޮޑުވެފައެވެ. އެގޮތުން މި އިންތިޚާބުގައި ޕާޓީގެ ރައީސް މުހައްމަދު ނަޝީދާއި، އިސް ލީޑަރު، ރައީސް އިބްރާހީމް މުހައްމަދު ޞާލިހުގެ ސިޔާސީ ވާދަވެރިކަން ފެނިގެންދާނެ ކަމަށް ގިނަ ބަޔަކު ދެކެއެވެ.
ރޯޒް ️