ރޮޒެއިނާގެ ސުވާލެއް: އަވަސް އަރުވާލައިގެން މިއުޅެނީ ކޮންކަމެއް ވެގެންތޯ؟
ވެރިކަން ކުރާ އެމްޑީޕީގެ އިންތިހާބެއްގައި ބައިވެރިވާ ކެނޑިޑޭޓުން ކެމްޕެއިނު ކުރުމަށް 60 ދުވަސް ލިބެން ޖެހޭނެ ކަމަށާއި އެ މުއްދަތު ނުދީ "އަވަސް އަރުވައިލައިގެން" އުޅެނީ ކީއްވެތޯ އެމްޑީޕީގެ އަންހެނުންގެ ރޫޙްގެ ރައީސްކަމަށް ކުރިމަތިލައްވައިފައިވާ ، އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ސުވާލު ކުރައްވައިފިއެވެ.
އެމްޑީޕީގެ އެތެރޭގެ އިންތިހާބު ބާއްވަން މިހާރު ހަމަޖައްސައިފައި ވަނީ އަންނަ އޭޕްރިލް މަހުގެ 16ވަނަ ދުވަހުގައެވެ.
މި އިންތިހާބު ރަމަޟާން މަހާ ދިމާވާތީ، ފައްޔާޒް އިސްމާއިލްގެ ޓީމުން އެދެނީ އެހެން ތާރީޚެއްގައި އިންތިހާބު ބޭއްވުމަށެވެ. ނަމަވެސް ޗެއާޕާސަންކަމަށް ވާދަކުރައްވާ އަނެއް ކެނޑިޑޭޓް އިމްތިޔާޒު ފަހުމީގެ ޓީމުން ދަނީ، އިންތިހާބު ފަސްކުރުމަށް ދެކޮޅު ހަދަމުންނެވެ.
މި އިންތިހާބު ބާއްވާ ތާރީޚެއް ކަނޑައެޅުމާ މެދު ގޮތެއް ނިންމުމަށް އެ ޕާޓީގެ ޤައުމީ މަޖިލިސް ޖަލްސާގައި މިރޭ ވާހަކަ ދައްކަވަމުން ރޮޒެއިނާ ވިދާޅުވީ ކެމްޕެއިނު ކުރަން 60 ދުވަސް ދިނުމަށް އެ ޕާޓީގެ އަސާސީ ޤަވާއިދުގައި އޮންނަ ކަމުގައިވާ ނަމަ، ކެމްޕެއިނު ކުރަން އެ 60 ދުވަސް ލިބެން ޖެހޭނެ ކަމަށެވެ.
"އަވަސް އަރުވައިލައިގެން އުޅެނީ ކޮންކަމެއް ވެގެންތޯ؟ ކެނޑިޑޭޓުންގެ ޙައްޤެކޭ ކެމްޕެއިނު ކުރުމަކީ. އެ ޙައްޤަކަށް ވެސް އަރައިގަންނާކަށް ނުޖެހެޔޭ" ރޮޒެއިނާ ވިދާޅުވިއެވެ.
މީގެ އިތުރުން ރޮޒެއިނާ ވިދާޅުވީ ދާއިރާތައް ހިނގާ ވާހަކަ އިމްތިޔާޒް ފަހުމީގެ ކެމްޕެއިނު ޓީމުން ދައްކަވާއިރު، މިނިސްޓަރ ފައްޔާޒްގެ ޓީމުން އެ ދާއިރާތަކަށް ކެމްޕެއިނު ދަތުރު ކުރެއްވި އިރު ދާއިރާތަކުގެ ރައްޔިތުން ދެއްކެވީ ރާއްޖޭގެ ރަށްތަކުގެ ދާއިރާތައް ނުހިނގާ ކަމުގެ ވާހަކަ ކަމަށެވެ.
"މިއަދު މި ކިޔަނީ ކީކޭތޯ؟ ނުހިނގާ! މާލޭގައި ހިނގީމަ ނިމުނީކީ ނޫނޭ. ރަށްރަށުގައި ވެސް ކަންތައްތައް ހިނގަން އެބަޖެހެޔޭ" ރޮޒެއިނާ ވިދާޅުވިއެވެ.
އެމްޑީޕީގެ ޗެއާޕަރސަން ކަމުގެ މަޤާމަށް ރޮޒެއިނާ ތާއީދުކުރައްވައި ކެމްޕެއިނު ކޮށްދެއްވަނީ މިނިސްޓަރ ފައްޔާޒްއަށެވެ.
