ޕަވަންދީޕާއި އަރުނިތާ ޤާނޫނީ މައްސަލަގަނޑެއްގެ ތެރެއަށް!
އިންޑިއަން އައިޑަލްގެ އެންމެ ފަހުގެ ސީޒަން، ސީޒަން12 ކާމިޔާބުކުރި ޕަވަންދީޕް ރާޖަންއާއި ދެވަނަ ހޯދި އަރުނިތާ ކަންޖާލް ، ވީޑިއޯތަކެއް ޝޫޓް ކުރުމަށް ދެކޮޅުހެދުމުން އެ ދެމީހުންނަށް ޤާނޫނީ މައްސަލައަކާ ކުރިމަތިލާން ޖެހިއްޖެއެވެ.
އިންޑިއާގެ ޚަބަރުތައް ބުނާ ގޮތުގައި އިންޑިއަން އައިޑަލް ސީޒަން12 ހިނގަމުން ދިޔައިރު ، އެ ޝޯވ ގެނެސްދޭ ސޮނީއާއި އޮކްޓޮޕަސް އެންޓަޓެއިންމަންޓް ކިޔާ މީޑިއާ ކުންފުންޏަކާ ދެމެދު ވަނީ މިޔުޒިކް އަލްބަމެއް އުފެއްދުމުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން އެ އަލްބަމްގައި ޕަވަންދީޕާއި އަރުނިތާގެ ބައިވެރިވުން ، ސޮނީއިން ދޭން ޖެހެއެވެ.
ނަމަވެސް އެކަން އެ ގޮތަށް ކުރިއަށް ނުދާތީ އޮކްޓޮޕަސް އެންޓަޓެއިންމަންޓުން މިހާރު ވަނީ އެ މައްސަލަ އިންޑިއަން މޯޝަން ޕިކްޗާ ޕްރޮޑިއުސަރސް އެސޯސިއޭޝަނަށް ހުށަހަޅައިފައެވެ. އޮކްޓޮޕަސްއިން ބުނެފައި ވަނީ 20 ލަވަ ހިމެނޭ އެ އަލްބަމްގެ އެއް ލަވައިގެ ޝޫޓިން ނިންމި ފަހުން އެއްވެސް ޝޫޓިންއަކަށް އެ ދެ ފަންނާނުން ގޮސްފައި ނުވާ ކަމަށެވެ. އަދި އެކަމާ ސޮނީއިން އެއްވެސް ފިޔަވަޅެއް ވެސް އަޅައިފައި ނުވާ ކަމަށް ފާހަގަކޮށްފައި ވެއެވެ.
އިންޑިއަން އައިޑަލްއިން ވިދާލި ޕަވަންދީޕާއި އަރުނިތާއަކީ އާންމުންގެ މެދުގައި ވަރަށް މަގުބޫލް ޖޯޑެކެވެ. އިންޑިއާގެ ކުޅަދާނަ މިޔުޒިކް އުފެއްދުންތެރިޔާ ހިމޭޝް ރޭޝަމިއާ އުފެއްދި "ހިމޭޝް ކޭ ދިލްސޭ"އަލްބަމަށް އެ ދެތަރީން ކިޔައިދިން ލަވަ ވެސް ވަނީ ހިޓްވެފައެވެ. އެ ލަވަޔަށް ޔޫޓިޔުބްގައި 46 މިލިއަން ވިއުސް ލިބިފައި ވެއެވެ.
