ޕުޝްޕާގެ ދެވަނަ ފިލްމަށް ތައްޔާރު ވަނީ ، މިފަހަރު ބޮލީވުޑަށް!
މުޅި ދުނިޔެއަށް ވެސް މަޝްހޫރުވެގެން ދިޔަ ދެކުނު އިންޑިއާގެ ފިލްމް "ޕުޝްޕާ،ދަ ރައިސް"ގެ ދެވަނަ ފިލްމަށް ތައްޔާރުވާން ފަށައިފިކަމަށް އިންޑިއާގެ މީޑިއާތަކުން ބުނެފިއެވެ.
ޚަބަރުތައް ބުނާ ގޮތުގައި މި ސީރީޒްގެ ދެވަނަ ފިލްމަކީ "ޕުޝްޕާ-ދަ ރޫލް"އެވެ. މި ފިލްމަށް ބަދަލުތައް ގެނެސް ، ފިލްމު ބޮޑަށް އަމާޒުކުރާނީ ބޮލީވުޑަށް ކަމަށް ޚަބަރުތައް ބުނެއެވެ. މީގެ އިތުރުން ފިލްމުން ބޮޑު މަގުބޫލުކަމެއް ހޯދި އައްލޫ އަރުޖުންއާއި "ސްރީވައްލީ"ގެ ރޯލް ކުޅުނު ރަޝްމިކާގެ އިތުރުން ދެވަނަ ފިލްމުގައި މަޝްހޫރު ތަރިންތަކެއް މުހިންމު ރޯލްތަކަކުން ފެނިގެންދާނެ ކަމަށް ޚަބަރުތައް ބުނެއެވެ.
"ޕުޝްޕާ،ދަ ރައިސް"އަކީ ލަކުޑީގެ ވަގު ވިޔަފާރިއަށް ބިނާކޮށް ހަދައިފައިވާ ފިލްމެކެވެ. އެކްޝަންއާއި ލޯބީގެ ބައިތަކެއް ދައްކައިދޭ މި ފިލްމުން އެންމެ ބޮޑު މަގުބޫލުކަމެއް ލިބިގެން ދިޔައީ ފިލްމުގެ ލަވަތަކަށެވެ. އެ ގޮތުން "ސްރީވައްލީ"، "އޫ އަންތަވާ"އަދި "ސާމީސާމީ" ވެގެން ދިޔައީ މުޅި ދުނިޔޭގެ ލޯތައް ހުއްޓުނު ލަވަތަކަށެވެ. މި ލަވަތައް ދުނިޔޭގެ އެތައް ބަހަކުން ނެރެފައި ވެއެވެ. އަދި "ސްރީވައްލީ"ގެ ސިގްނޭޗަރ ސްޓެޕަށް މިލިއަނަކަށް ވުރެ ގިނަ ރީލްސް ހަދައިފައި ވެއެވެ.
