ޖާބިރުގެ އިތުރު ތުހުމަތެއް އާޒިމަށް
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ(އެމްޓީސީސީ)ގެ ސީއީއޯ އާދަމް އާޒިމަށް އަނެއްކާ ވެސް އިތުރު ތުހުމަތުތަކެއް ކުރައްވައިފިއެވެ.
ރައްޔިތުންގެ މަޖިލީހުގެ މީގެ ކުރިން ބޭއްވި ޖަލްސާއެއްގައި ޖާބިރު ވަނީ އާޒިމަކީ "ވަގެއް" ކަމަށް ތުހުމަތު ކުރައްވައިފައެވެ. އެގޮތުން އާޒިމަކީ ގަވައިދުން ވައްކާކުރާ މީހެއް ކަމަށް ތުހުމަތުކޮށް، އެކަން މަޖިލީހުން ބެލުމަށް ވެސް ޖާބިރު ގޮވައިލެއްވިއެވެ.
"ގަވާއިދުން އާދަމް އާޒިމް ވައްކަން ކުރަމުން ދާއިރުގައި، އެ މައްސަލަ މި މަޖިލީހަށް ނުބެލޭ! ކޮންފްލިކްޓް ކިހައި ހިސާބަކުން އަންނަނީ؟ ހުރިހާ އެގްރީމަންޓްތަކެއް މި ދެނީ އޭނާގެ ބޭބެ ނާޒިމަށް." ޖާބިރު ވިދާޅުވެފައިވެެއެވެ.
މަޖިލީހުގެ މިއަދުގެ ޖަލްސާގައި ޖާބިރު އާޒިމަށް ތުހުމަތު ކުރެއްވީ ސަރުކާރަށް އިންތިހާބުތައް ކާމިޔާބު ކޮށްދޭން އެމްޓީސީސީ ބޭނުން ކުރައްވާ ކަމަށެވެ.
"ތަަރައްގީވަމުން އަންނަ ގައުމެއްގައި، ޑިމޮކްރަސީއާއި ކޮރަޕްޝަނުގައި ސޮއްސާލީމައި އެދިޔައީ ގޯހުން ގޯހަށް." އޭނާ ވިދާޅުވިއެވެ.
އެމްޓީސީސީ މެދުވެރިކޮށް އިންތިހާބަށް ނުފޫޒު ފޯރުވާ ކަމަށް ޖާބިރު ތުހުމަތު ކުރެއްވިއިރު، މިދިޔަ މަހު ބޭއްވި ކޮމަންޑޫ ދާއިރާގެ ބައި-އިލެކްޝަނާ ދިމާކޮށް އެމްޓީސީސީއަށް ވަނީ ދެ ކޮމަންޑޫ ގުޅުވައިލުމުގެ މަޝްރޫއު ހަވާލުކޮށްފައެވެެ. އަދި އެ ކުންފުނީގެ ސީއެސްއާރުގެ ދަށުން، ކޮމަންޑޫ ފުޓްބޯޅަ ދަނޑެއް އެޅުމުގެ އަމަލީ މަސައްކަތް ވެސް ވަނީ ފަށައިފައެވެ.
މިއީ އިންތިހާބަށް ނުފޫޒު ފޯރުވުމަށް ހިންގި މަޝްރޫއުތަކެއް ކަމަށް އިދިކޮޅުން ތުހުމަތު ކުރިއެވެ. ނަމަވެސް ސަރުކާރުން ބުނީ، ކޮމަންޑޫ ދާއިރާގައި ފެށީ ކުރިން ވެސް ރާވައިފައިވާ މަޝްރޫއުތަކެއް ކަމަށެވެ.
