ދެ ކައިވެނި ވެސް ރޫޅުނީ މޮޅެތި ފިލްމް ކުޅެން ހަދައިގެން
މީގެ ކުރިން ދެ ކައިވެންޏެއްކޮށްފައިވާ، ބޮލީވުޑްގެ މަޝްހޫރު ތަރި އާމިރް ޚާން، އޭނާގެ ކައިވެނި ރޫޅުނު ސަބަބު ކިޔައިދީފިއެވެ.
57 ވަނަ އުފަންދުވަހާ ގުޅުވައިގެން އިއްޔެ އިންޑިއާގެ ނޫހަކަށް ދިން އިންޓަވިއުއެއްގައި އާމިރު ޚާން ބުނެފައި ވަނީ، ކުރި ދެ ކައިވެނި ވެސް ކާމިޔާބު ނުވެ ރޫޅައިލާން ޖެހުނީ އޭނާގެ ސަބަބުން ކަމަށެވެ. ކައިވެނި ރޫޅުމަށް މެދުވެރިވީ، އާއިލާއަށް ވުރެ ބޮޑަށް ކެރިއާއަށް ސަމާލުކަން ދެވުމުން ކަމަށް އޭނާ ބުންޏެވެ.
އާމިރު ބުނެފައި ވަނީ، މޮޅެތި ފިލްމްތައް ކުޅެން ހަދައިގެން އޭނާގެ އާއިލާއަށް ވަގުތު ނުދެވުނު ކަމަށެވެ. އަދި އާއިލާއަށް ވަގުތު ނުދެވޭކަން ރޭކާލީ ވަގުތު ފާއިތުވި ފަހުން ކަމަށް އޭނާ ބުންޏެވެ.
"މިހައިތަނަށް މުޅިން ވެސް މަސައްކަތް ކުރަމުން އައި ބެލުންތެރިންގެ ހިތް އަތުލައިގަނެވޭ ވަރުގެ މަސައްކަތްތަކެއް ކުރުމަށް. އާއިލާ މަތިން އެއްކޮށްހެން ހަނދާން ނެތިފައި ހުރީ" ކައިވެނި ރޫޅުނު ސަބަބާ ގުޅޭ ގޮތުން ފުރަތަމަ ފަހަރަށް ވާހަކަ ދައްކަމުން އޭނާ ބުންޏެވެ.
ބޮލީވުޑަށް ނުކުތް އިރު ވެސް އާމިރު ހާން އުޅެނީ ކައިވެނިކޮށްގެންނެވެ. އާމިރު އެންމެ ފުރަތަމަ އަނތްބަކީ ރީނާ ދައްތާއެވެ. އޭނާ ކައިވެންޏަށް އަންހެން ކުއްޖަކާއި ފިރިހެން ކުއްޖަކު ލިބިފައިވެއެވެ. އެ ދެ މީހުން ވަރިވީ އެކުގައި 16 އަހަރު އުޅުމަށް ފަހުއެވެ. އޭގެ ފަހުން އޭނާ ކައިވެނިކޮށްފައި ވަނީ، ފިލްމު ޕްރޮޑިއުސާ ކިރަން ރާއޯއާއެވެ. އެ ކައިވެންޏަށް ފިރިހެން ކުއްޖަކު ލިބިފައިވާ އިރު، މިދިޔަ އަހަރު އެ ދެމީހުން ވަނީ ވަރިވެފައެވެ.
