ކަރީނާ އަދި އާލިޔާ ވެސް ރާއްޖޭގައި
ބޮލީވުޑްގެ މަޝްހޫރު ދެ ތަރިން ކަމަށްވާ އާލިޔާ ބަޓްއާއި ކަރީނާ ކަޕޫރު ޗުއްޓީ ހޭދަ ކުރުމަށް ރާއްޖެ އަތުވެއްޖެއެވެ.
އާލިޔާ ރާއްޖެ އައިސްފައި ވަނީ އޭނާގެ އުފަން ދުވަސް ފާހަގަ ކުރުމަށެވެ. އާލިޔާ އައިސްފައި ވަނީ އޭނާގެ މަންމަ އަދި ދައްތައާއެކުގައެވެ.
މިއީ އާލިޔާގެ 28ވަނަ އުފަން ދުވަހެވެ. އާލިޔާ ވަނީ އޭނާގެ އިންސްޓަގްރާމް ސްޓޯރީގައި ރާއްޖޭގައި އުޅޭ ކަމަށް ބުނެ، ފޮޓޯތައް ހިއްސާކޮށްފައެވެ.
ކަރީނާ ކަޕޫރު ޚާން ރާއްޖެ އައިސްފައި ވަނީ އޭނާގެ ދަރިން ޓައިމޫރް އަދި ޖެހް ގޮވައިގެންނެވެ. އަދި ދައްތަ ކަރިޝްމާ ކަޕޫރު ވެސް ކަރީނާއާ އެކު އައިސްފައިވެއެވެ. ޗުއްޓީ ހޭދަކޮށްލަން ކަރީނާ ރާއްޖެ އައިސްފައި ވަނީ ކޮން މުނާސަބަތަކާ ގުޅިގެން ކަމެއް އެނގިފައެއް ނުވެއެވެ. ނަމަވެސް އޭނާ ރާއްޖެ އައީ ޕްރައިވެޓް ޖެޓެއްގައި ކަމަށް އިންޑިއާގެ ނޫސްތަކުން ރިޕޯޓް ކުރެއެވެ.
ކަރީނާ ކަޕޫރު ޚާން ދެން އެންމެ އަވަހަށް ފެންނާނީ "ލާލް ސިންގް ޗައްޑާ"އިންނެވެ. ހޮލީވުޑް ފިލްމު "ފޮރެސްޓް ގަމްޕް" އަސްލަކަށް ބަލައިގެން އުފައްދާ މި ފިލްމު މިހާރު ރިލީޒްކުރަން ތާވަލުކޮށްފައި ވަނީ އަންނަ އޯގަސްޓް 11ވަނަ ދުވަހަށެވެ.
އާއިލާ އަދި ކަރީނާ ޗުއްޓީ ހޭދަ ކުރަމުން އަންނަނީ ދެ ރިސޯޓެއްގައެވެ.
