ރައީސް ޔާމީން މިއަދު ކުރެންދުއަށް ވަޑައިގަންނަވަނީ
ރައީސް އަބްދުﷲ ޔާމީން އަބްދުލްގައްޔޫމް، މިއަދު ޅ.ކުރެންދުއަށް ވަޑައިގަންނަވާނެ ކަމަށް އިދިކޮޅު ކޯލިޝަނުން ބުނެފިއެވެ.
އެމަނިކުފާނު ކުރެންދޫއަށް ވަޑައިގަންނަވާ ގޮތަށް ހަމަޖެހިފައި މިވަނީ އެރަށު ކައުންސިލަށް ރައީސަކު ހޮވުމަށް ބާއްވާ އިންތިޚާބާ ގުޅިގެންނެވެ.
މި ބައި-އިލެކްޝަނަށް ވެރިކަން ކުރާ މައި ޕާޓީ، އެމްޑީޕީން ވާދަކުރަނީ ޅ. ކުރެންދޫ، ރީހުއްސަބާ، އަލީ ނަސީމެވެ. އެމްޑީޕީން ކެނޑިޑޭޓް ނެރެފައި ވަނީ އެތެރޭގެ އިންތިޚާބަކުންނެވެ. އެ އިންތިޚާބަށް ހުޅުވައިލުމުން ކުރިމަތިލީ ވެސް ނަސީމް އެކަންޏެވެ.
މީގެ އިތުރަށް ޕީޕީއެމުން މި ދާއިރާއަށް ވާދަކުރަނީ ކުރިން ވެސް ކުރެންދޫ ކައުންސިލްގެ ރައީސްކަން ކުރެއްވި އިސްމާއީލް މަދީހެވެ. އެޕާޓީން ވެސް މަދީހު ހޮވައިފައި ވަނީ ޕްރައިމަރީއަކަށް ހުޅުވައިލައިގެންނެވެ. އެ އިންތިހާބަށް ކުރިމަތިލީ މަދީހު އެކަންޏެވެ.
ރައީސް ޔާމީން ކުރެންދޫއަށް ވަޑައިގެންނެވުމަށްފަހުގައި، އެއަތޮޅު ނައިފަރުގައި ބާއްވާ "އިންޑިއާ އައުޓް" ހަރަކާތުގައި ބައިވެރިވެވަޑައިގަތުމަށް ވެސް ވަނީ ހަމަޖެހިފައެވެ.
ރައީސް ޔާމީން އިސްވެ ހުންނަވައި ފައްޓަވާފައިވާ "އިންޑިއާ އައުޓް" ހަރަކާތަކީ، އިދިކޮޅަށް 2023ވަަނަ އަހަރުގެ ރިޔާސީ އިންތިޚާބަށް ވުރެ ވެސް މުހިންމުކަމެއް ކަމަށް ޕީޕީއެމް-ޕީއެންސީން މީގެ ކުރިން ބުނެފައިވެއެވެ.
ރައީސް ޔާމީން ޖަލުން މިނިވަންވެވަޑައިގެންނެވި ފަހުން، އަތޮޅުތެރޭގައި އިންޑިއާ އައުޓް ކެމްޕެއިން ވަނީ ވަރަށް ބޮޑަށް ފުޅާވެފައެވެ.
