"ކަޝްމީރު ފައިލްސް"އިން ބީޖޭޕީ ހޯދަނީ ސިޔާސީ ފައިދާއެއް:ކޮންގްރެސް
ބޮލީވުޑްގެ ތިއޭޓަރުތަކުގައި ބޮޑު ކާމިޔާބީއެއް ހޯދަމުންދާ "ކަޝްމީރު ފައިލްސް"މެދުވެރިކޮށް ، ވެރިކަންކުރާ ބަހާރަތިޔާ ޖަނަތާ ޕާޓީ(ކޮންގްރެސް)އިން މަސައްކަތް ކުރަނީ ސިޔާސީ ފައިދާ ހޯދުމަށް ކަމަށް ޗައްޓިގަޅުގެ ޗީފް މިނިސްޓަރ ބުޕޭޝް ބާގަލް ބުނެފިއެވެ.
ކަޝްމީރު ފައިލްސްއަކީ ކަޝްމީރުގައި ހިނގާ ޓެރަރިޒަމްގެ އަމަލުތައް ދައްކައިދޭ ފިލްމެކެވެ. 15 ކްރޯޑް ރުޕީސް ޚަރަދުކޮށްގެން ހެދި މި ފިލްމަށް މިހައިތަނަށް 140 ކްރޯޑް ރުޕީސްއަށް ވުރެ ބޮޑު އާމްދަނީއެއް ލިބިފައި ވެއެވެ.
މި ފިލްމު ވެގެން ގޮސްފައި ވަނީ ބީޖޭޕީއަށް ވަރަށް ކަމުދާ ފިލްމަކަށެވެ. މި ފިލްމާ ގުޅޭ ގޮތުން ބޮޑުވަޒީރު ނަރެންދުރަ މޯދީ ގާނޫނު ހަދާ މަޖިލީހުގައި ބުނީ "ޙަޤީޤަތް ހާމަކޮށްދިނުމުގެ ކެރުންތެރިކަން ފެނިގެން ހިނގައްޖެ" ކަމަށެވެ. އެއާ އެކު ބީޖޭޕީ ވެރިކަންކުރާ ގިނަ ސްޓޭޓްތަކުގައި މި ފިލްމް ވަނީ ޓެކްސް ނުނަގާ ފިލްމެއްގެ ގޮތުގައި ހަމަޖައްސައިފައެވެ.
މި ފިލްމާ ގުޅޭ ގޮތުން އިދިކޮޅު ކޮންގްރެސް ޕާޓީއަށް ނިސްބަތްވާ ބުޕޭޝް ބުނީ ފިލްމު ބަލައިފި ކަމަށާއި ފިލްމުގައި ދައްކުވައިދެނީ ކަޝްމީރުގައި ހިނގާ ކަންތައްތަކުގެ އެއްފަޅި ކަމަށާއި އަދި އެއީ ކަމުދާ ގޮތެއް ނޫން ކަމަށެވެ. އަދި ފިލްމުން ފެނިގެންދަނީ ޙަޤީޤީ ހާދިސާގެ އެއްބައިކަމަށް އޭނާ ބުނެފައި ވެއެވެ. މީގެ އިތުރުން މި ފިލްމު މެދުވެރިކޮށް ސިޔާސީ ފައިދާ ހޯދަން ބީޖޭޕީން މަސައްކަތްކުރާ ކަމުގެ ތުހުމަތު ވެސް އޭނާ ކުރިއެވެ.
"ބީޖޭޕީން ބޭނުން ވަނީ މިފިލްމު މެދުވެރިކޮށް 2024ގެ ލޮކްޝަބާ އިންތިޚާބަށް ތައްޔާރުވާން ކަމަށް ވަންޏާ ގައުމު އެ ގެންދަނީ މުޅީން ނުބައި މިސްރާބަކަށް" އޭނާ ބުނެފައި ވެއެވެ.
ކަޝްމީރު ފައިލްސްއަކީ 14 މިލިއަން މީހުންގެ އާބާދީއެއް އޮންނަ ކަޝްމީރުގައި ދިރިއުޅޭ އެއް އާއިލާއެއްގެ މައްޗަށް ބިނާކޮށްފައިވާ ފިލްމެކެވެ. މުސްލިމުންގެ 75އިންސައްތަ ހިއްސާކުރާ ކަޝްމީރާ ގުޅޭ ގޮތުން ބޮލީވުޑްގައި އުފައްދާ މި ފަދަ ފިލްމުތަކުގައި އަބަދުވެސް ބުރަވެފައި ވަނީ އިންޑިއާ ކޮޅަށެވެ. އެފަދަ ގިނަ ފިލްމުތަކުގައި މުސްލިމުން ދައްކުވައިދީފައި ވަނީ ނިރުބަވެރިންގެ ގޮތުގައެވެ.
Ads by STO
