ލަންކާގައި ތެޔޮ ގަންނަން ކިޔޫގައި ތިއްބައި 2 މީހަކު މަރުވެއްޖެ
ސްރީލަންކާގައި ތެލުގެ ދަތިކަން އިންތިހާއަށް ބޮޑުވެފައިވާ މި ދަނޑިވަޅުގައި ތެޔޮ ގަންނަން ދިގު ކިއޫއެއްގައި މަޑުކޮށްލައިގެން ތިބި ދެ މީހަކު ސްރީލަންކާގައި މަރުވެއްޖެއެވެ.
ކޮލަމްބޯގެ ފުލުހުންގެ ތަރުޖަމާނު ނަލިން ތެލްދުވާ އާދީއްތަ ދުވަހު ބުނީ ކިޔޫގައި ތިއްބައި މަރުވި އެކަކީ 70 އަހަރުގެ ޑްރައިވަރެއް ކަމަށާއި އޭނާ އަކީ ޑައިބެޓިކް އަދި ހިތުގެ ބަލިމީހެއް ކަމަށެވެ. މަރުވި ދެވަނަ މީހާއަކީ 72 އަހަރުގެ މީހެއް ކަމަށާއި ދެ މީހުން ވެސް ތެޔޮ ގަންނަން ގާތްގަނޑަކަށް ހަތަރު ގަޑިއިރު ވަންދެން ކިޔޫގައި މަޑުކޮށްލައިގެން ތިބީ ކަމަށް ތެލްދުވާ ބުންޏެވެ.
ސްރީލަންކާގެ ރައްޔިތުން ތެޔޮ ގަންނަން ކިޔޫ ހަދައިގެން އެތައް ގަޑިއިރެއް ވަންދެން ކިޔޫގައި ތިބެން ޖެހިފައި ވާއިރު، މިއީ އެ ގައުމުގެ ތާރީހުގައި ވެސް ކުރިމަތިވި އެންމެ ބޮޑު އިގުތިސޯދީ ކާރިސާކަމަށް ސްރީލަންކާ ރައްޔިތުން ދަނީ ބުނަމުންނެވެ.
ރިޕޯޓްތައް ބުނާ ގޮތުގައި ހަފްތާ ބަންދުގައި ކައްކާ ގޭސް ގަތުމަށް އަވީގައި ކިޔޫ ހަދައިގެން ގިނައިރުތަކެއް ވަންދެން ކޮޅަށް ތިބި ގިނަ އަންހެނުންތަކެއް ވެސް ވަނީ ހޭނެތިފައެވެ.
