"އިންޑިއާ އައުޓް" ހަރަކާތް ކުރިއަށް ނުގެންދެވޭނެ ކަމަށް ސަރުކާރުން އަންގައިފައެއް ނުވޭ: އިދިކޮޅު
އިދިކޮޅު ޕްރޮގްރެސިވް ކޯލިޝަނުން އަންނަ ހުކުރު ދުވަހު ބޭއްވުމަށް ހަމަޖެހިފައިވާ "އިންޑިއާ އައުޓް" ހަރަކާތް ކުރިއަށް ނުގެންދެވޭނެ ކަމަށް އެ ކޯލިޝަނަށް އަންގައިފައިވާނެ ކަމަށް ސަރުކާރުން ބުނެފައި ވިޔަސް، އެފަދަ އެންގުމެއް އެއްވެސް އިދާރާއަކުން އަންގައިފައި ނުވާކަމަށް ޕްރޮގްރެސިވް ކޮންގްރެސް ކޯލިޝަނުން މިއަދު ބުނެފިއެވެ.
އިދިކޮޅު ޕީޕީއެމް/ޕީއެންސީއިން އިސްނަގައިގެން އަންނަ ހުކުރު ދުވަހު ބޭއްވުމަށް ރާވާ އެއްވުން ހުއްޓުވާނެ ކަމަށް ހޯމް މިނިސްޓަރު އިމްރާން އަބްދުﷲ އިއްޔެ ރައްޔިތުންގެ މަޖިލީހުގައި ވަނީ ވިދާޅުވެފައެވެ.
އެގޮތުން މިނިސްޓަރ އިމްރާން ވިދާޅުވީ އިދިކޮޅުން ބާއްވަން އުޅެނީ ގާނޫނާ ހިލާފު ހަރަކާތެއް ކަމަށާއި އެހެންވެ އެ ހަރަކާތް ކުރިއަކަށް ނުގެންދެވޭނެ ކަމަށެވެ. އަދި އެ ހަރަކާތް ނުބޭއްވޭނެކަން އިދިކޮޅަށް އަންގައިފައިވާނެ ކަމަށް ވެސް މިނިސްޓަރ ވިދާޅުވިއެވެ.
މިކަމާ ގުޅޭ ގޮތުން އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޯލިޝަންގެ ހަރަކާތް ކޮމިޓީގެ މެމްބަރު އަދި ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވީ މިހައިތަނަށް އެއްވެސް އިދާރާއަކުން ހުކުރު ދުވަހުގެ ހަރަކާތް ހުއްޓާލަން ޕްރޮގްރެސިވް ކޯލިޝަނަށް އަންގައިފައި ނުވާ ކަމަށެވެ.
"އަޅުގަނޑުމެންނަށް އެއްވެސް ސަރުކާރުގެ އިދާރާއަކުން މި އިހުތިޖާޖް ކުރިއަށް ނުގެންދެވޭނެ ކަމަކަށް އަންގައިފައެއް ނުވޭ. އަދި ގައުމީ ސަލާމަތަށް ނުރައްކާ ހުރި އިހުތިޖާޖެއްގެ ގޮތުގައި ވެސް ސަރުކާރުގެ އެއްވެސް ވުޒާރާއަކުން އަޅުގަނޑުމެންނަށް އަންގައިފައެއް ނެތް،" މުހައްމަދު އިސްމާއިލް ވިދާޅުވިއެވެ.
މީގެ އިތުރުން "އިންޑިއާ އައުޓް" ހަރަކާތަކީ ގައުމީ ސަލާމަތަށް ނުރައްކާވާ ކަމެއްގެ ގޮތުގައި ސަރުކާރުގެ އިސްވެރިން ސިފަ ކުރައްވަމުން ގެންދަވަނީ ސިޔާސީ ބޭނުމެއް ހާސިލުކުރުމަށް ކަމަށް ވެސް އޭނާ ވިދާޅުވިއެވެ.
