“ނޭވާހޮޅިއަށް” ހަރަކާތް ނުބޭއްވޭނެ ކަމަށް އަންގައިފި، އިދިކޮޅުން ބުނީ ހަރަކާތް ކުރިޔަށްގެންދާނެ ކަމަށް
އިދިކޮޅު ކޯލިޝަނުން މާލޭގައި ބާއްވާ“އިންޑިއާ އައުޓް”ހަރަކާތުގެ ތެރެއިން އަންނަ ހުކުރު ދުވަހު މާލޭގައި “ނޭވާހޮޅިއަށް”ނަމުގައި ބާއްވާ ބޮޑު ހަރަކާތް ނުބޭއްވޭނެކަމަށް ފުލުހުން މިއަދު އަންގަވައިފިއެވެ.
ޕީޕީއެމްގެ ތަރުޖަމާނު، ހީނާ ވަލީދު ވިދާޅުވީ ހަރަކާތް ކުރިއަށް ނުގެންދެވޭނެ ކަމަށް ފުލުހުން އަންގަވައިފައިވާ ކަމަށާއި ހަރަކާތް ނުބޭއްވެންވީ އެއްވެސް ސަބަބެއް ވިދާޅުވެފައި ނުވާ ކަމަށެވެ.
ހީނާ ވިދާޅުވީ ފުލުހުން އެފަދައިން ވިދާޅުވި ނަމަވެސް އެ ހަރަކާތް ކުރިއަށް ގެންދަވާނެ ކަމަށާއި އެ ހަރަކާތަކީ ސުލްހަވެރި ހަރަކާތެއް ކަމަށެވެ. އަދި އެއްވެސް ހަމަނުޖެހުމެއް ހިންގަން ނޫޅޭކަމަށް ހީނާ ވިދާޅުވިއެވެ.
އިދިކޮޅު ޕީޕީއެމް/ޕީއެންސީއިން އިސްނަގައިގެން އަންނަ ހުކުރު ދުވަހު ބޭއްވުމަށް ރާވާ، އެއްވުން ހުއްޓުވާނެ ކަމަށް ހޯމް މިނިސްޓަރު އިމްރާން އަބްދުﷲ ވެސް ވަނީ ވިދާޅުވެފައެވެ. މިނިސްޓަރ އިމްރާން ވިދާޅުވީ އިދިކޮޅުން ބާއްވަން އުޅެނީ ގާނޫނާ ހިލާފު ހަރަކާތެއް ކަމަށާއި އެ ހަރަކާތް ކުރިއަކަށް ނުގެންދެވޭނެ ކަމަށެވެ.
Ads by STO
