ސިޔާސީ ހަރަކާތްތައް ބާއްވާއިރު ޚާރިޖީ ގުޅުންތަކަށް އިހްތިރާމް ކުރުމަށް އީސީން އިލްތިމާސްކޮށްފި

ސިޔާސީ ހަރަކާތްތައް ބާއްވާއިރު ޚާރިޖީ ގުޅުންތަކަށް އިހްތިރާމް ކުރުމަށް އިލެކްޝަންސް ކޮމިޝަން (އީސީ)އިން އިލްތިމާސްކޮށްފިއެވެ.

Ads by Sosun Fihaara

އެ ކޮމިޝަނުން މިފަދައިން އިލްތިމާސް ކޮށްފައި މިވަނީ، ރާއްޖެއިން އިންޑިއާ ސިފައިން ބޭލުމަށް ގޮވައިލައި އިދިކޮޅު ޕްރޮގްރެސިވް ކޮންގްރެސް ކޯލިޝަނުން މާދަމާ ސިޔާސީ އެއްވުމެއް ބޭއްވުމަށް ތައްޔާރުވަމުން ދަނިކޮށެވެ.

އީސީން މިރޭ ނެރުނު ބަޔާނެއްގައި ބުނެފައި ވަނީ ސިޔާސީ ޕާޓީތަކަށް ޤާނޫނުން، ސިޔާސީ ހަރަކާތްތައް ހިންގުމުގެ މަގުފަހި ކޮށްދީފައި ވަނީ ޤާނޫނު އަސާސީއާއި ސިޔާސީ ޕާޓީގެ ޤާނޫނާއި ޤަވާއިދާއި، ދިވެހި ރާއްޖޭގައި ޢަމަލުކުރަމުންދާ ކަމާބެހޭ އެހެނިހެން ޤާނޫނުތަކާއި ޤަވާއިދުތަކުގެ ޙުދޫދުގެ ތެރޭގައި ކަމަށް ވާތީ، ޕާޓީތަކުން އިންތިޒާމު ކޮށްގެން ބާއްވާ ބައްދަލުވުންތަކާއި ސިޔާސީ ހަރަކާތްތައް، ޤާނޫނާއި ޤަވާއިދުގެ ޙުދޫދުގެ ތެރޭގައި ދިވެހިރާއްޖޭގެ ދާޚިލީ ހަމަޖެހުމާއި ދައުލަތުގެ ޚާރިޖީ ސިޔާސަތުތަކާއި ޚާރިޖީ ގުޅުންތަކަށް އިހުތިރާމު ކުރުމާއެކު ކުރިއަށް ގެންދިޔުމަށެވެ.

އަދި ދައުލަތުގެ އިދާރާތަކުން އަންގައި އެންގުންތަކަށް ބޯލެނބުމަށް ސިޔާސީ ޕާޓީތަކުގެ ބެލެނިވެރި ފަރާތުގެ ހައިސިއްޔަތުން އީސީން ވަނީ އިލްތިމާސް ކޮށްފައެވެ.

ޤާނޫނުތަކާއި ޤަވާއިދުތަކުގެ ޙުދޫދުގެ ތެރެއިން ކުރިއަށް ގެންދާ ސިޔާސީ ހަރަކާތްތަކަށް އަބަދުވެސް އިލެކްޝަންސް ކޮމިޝަންގެ ފުރިހަމަ އެއްބާރުލުން ދެމުން ދާނެ ކަމުގައި ވެސް އީސީން ބުނެފައިވެއެވެ.

އިދިކޮޅު ފަރާތްތަކުގެ ހަރަކާތާ ދިމާކޮށް އީސީން މިހެން ބުނެފައިވާ އިރު، މާދަމާގެ އެ ހަރަކާތް ނުބޭއްވުމަށާއި އެ ހަރަކާތް ހުއްޓުވާނެ ކަމަށް ފުލުހުން ވެސް ވަނީ ވިދާޅުވެފައެވެ.