ރައީސްގެ ދެކަނބަލުން ފުވައްމުލަކު ނޭޗަރ ޕާކް ބައްލަވައިލައްވައިފި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެ މަނިކުފާނުގެ އަނބިކަނބަލުން ފަޒްނާ އަޙްމަދު ފުވައްމުލައް ސިޓީއަށް ކުރައްވާ ދަތުރުފުޅުގެ ތެރެެއިން، އެ ސިޓީގެ ނޭޗަރ ޕާކަށް ޒިޔާރަތްކުރައްވައި އެ ތަން ބައްލަވައިލައްވައިފިއެވެ.
ރައީސްގެ ދެކަނބަލުން ނޭޗަރ ޕާކަށް ޒިޔާރަތްކުރެއްވުމުން، ސިޓީ ކައުންސިލްގެ ފަރާތުން ވަނީ ނޭޗަރޕާކާއި ބެހޭ މަޢުލޫމާތު އެ އެ ދެކަނބަލުންނަށް ހިއްސާކުރައްވައިފައެވެ.
ނޭޗަރ ޕާކު ތަރައްޤީ ކުރުމަށް މުސްތަޤުބަލުގައި ވިސްނާ ކަންކަމުގެ ތެރޭގައި ޗަސްބިން ތެރޭގައި ވޯކްވޭއެއް ހެދުމާއި ކޮންވެންޝަން ސެންޓަރެއް އަދި ވިޒިޓަރ ސެންޓަރެއް ގާއިމުކުރުން ހިމެނޭކަމަށް ސިޓީ ކައުންސިލުން ރައީސްއާ ހިއްސާކުރެއްވި މަޢުލޫމާތުގެ ތެރޭގައި ހިމެނެއެވެ.
ނޭޗަރ ޕާކަށް ކުރެއްވި މި ޒިޔާރަތުގައި ފުވައްމުލަކު ސިޓީ ކައުންސިލްގެ ފަރާތުން ވަނީ ފުވައްމުލަކުގެ ގުދުރަތީ ކަންކަމާ ގުޅޭ މަޢުލޫމާތު ހިމެނޭ ފޮތެއް ހަދިޔާކުރައްވައިފައެވެ. އަދި ނޭޗަރ ޕާކު ފެންނަ ތަސްވީރެއް ވެސް ރައީސްއަށް ހަދިޔާކުރެއްވިއެވެ.
Ads by STO
