ބޮލީވުޑް ސްކްރީން: ޝާހްރުކްގެ އެބްސަށް ސުހާނާގެ ވެސް ތައުރީފު
ބޮލީވުޑްގެ ޚަބަރުތަކަށް އަވަސް ނަޒަރެއް ހިންގައިލާއިރު، އެންމެ ފާހަގަ ކޮށްލެވޭ ޚަބަރެއްގެ ގޮތުގައި، މަޝްހޫރު ޑިރެކްޓަރ ކަބީރް ޚާނަށް ކުރިމަތިވަމުން އަންނަ ހިތްދަތި ކަންތައްތައް ހިމެނެއެވެ.
އޭބީޕީ ނެޓްވޯކަށް އެންމެ ފަހުން ދިން އިންޓަވިއުއެއްގައި ކަބީރް ބުނީ، އޭނާގެ ނަމުގެ ފަހަތަށް "ޚާން" އޮންނާތީ ޕާކިސްތާނަށް ދާށޭ ބުނެ ވަރަށް ގިނަ މީހުން އޭނާއަށް ފުރައްސާރަ ކުރާ ކަމަށެވެ.
ޝާހްރުކްގެ އެބްސަށް ސުހާނާގެ ވެސް ތައުރީފު
ދުވަސްކޮޅަކަށް ގެއްލުމަށް ފަހު، ބޮލީވުޑް ސުޕާސްޓަރ ޝާހްރުކް ޚާން އަނެއްކާ ވެސް މިވަނީ ނޫސްތަކުގެ ހެޑްލައިނަށް އަރަން ފަށަައިފައެވެ.
އޭނާ މިހާރު ކުޅެމުންދާ ފިލްމު "ޕަތާން"ގެ ޝޫޓިންގް ތެރޭގައި ނެގި ފޮޓޯއެއް އިންސްޓްގްރާމްގައި ހިއްސާ ކުރުމުން، އެތައް އަންހެން ކުދިންނެއް ވަނީ އާޝޯހުވެފައެވެ.
ޝާހްރުކްގެ 8 އެބްސް ފެނި، ތައުރީފު ކުރި މީހުންގެ ތެރޭގައި އޭނާގެ އަންހެން ދަރި ސުހާނާ ޚާން ވެސް ހިމެނެއެވެ. ސުހާނާ ބުނީ ޝާހްރުކްއަށް 56 އަހަރު ފުރިފައި ވިޔަސް އެހެން ފިރިހެނުންނަށް ވުރެ ރީތި ކަމަށެވެ.
ވިވޭކްގެ ދިފާއުގައި ނަވާޒުއްދީން
އެންމެ ފަހުން ރިލީޒްވި ފިލްމުތަކަށް ބަލާއިރު، ވިވޭކް އަގްނިހޯތުރީ ޕްރޮޑިއުސްކޮށް ޑައިރެކްޓުކުރި ފިލްމު "ކަޝްމީރް ފައިލްސް"އާ ގުޅިގެން އޭނާއަށް ވަނީ ފާޑު ކިޔުންތަކެއް އަމާޒުވެފައެވެ.
އިންޑިއާގެ ކަޝްމީރުގައި ކަންކަން ހިނގާ ގޮތާ ތަފާތުކޮށް ވިވޭކް އެ ފިލްމު ހެދުމުން، އެތައް ބަޔަކު ވަނީ އޭނާއާ ދިމާލަށް ނުރުހުމުގެ ބަސްތައް ބުނެފައެވެ.
ނަމަވެސް އެކްޓަރ ނަވާޒުއްދީން ސިއްދީގީ ވަނީ އެފާޑުކިޔުންތަކުން ވިވޭކް ދިފާއުކޮށްފައެވެ. ނަވާޒުއްދީން ބުނީ ކޮންމެ މީހަކަށް ވެސް އެމީހަކު ބޭނުން ގޮތަކަށް ފިލްމު ހެދޭނެ ކަމަށާއި އެގޮތަށް ވިވޭކް ވެސް ފިލްމެއް ހެދީ ކަމަށާއި އެ ފިލްމު ރީތި ކަމަށް ވެސް ނަވާޒުއްދީން ބުންޏެވެ.
