ބޮލީވުޑް ސްކްރީން: އާލިއާއާ ރަންބީރްގެ ކައިވެންޏާ ބެހޭ ގޮތުން އާއިލާއިން ވާހަކަ ދައްކައިފި
ބޮލީވުޑްގެ ޚަބަރުތަކަށް ބަލައިލާއިރު، މަޝްހޫރު ދެ އެކްޓަރުން ކަމަށްވާ އާލިއާ ބަޓާއި ރަންބީރް ކަޕޫރްގެ ކައިވެންޏާ ބެހޭ ގޮތުން، ރަންބީރްގެ އާއިލާއިން ވާހަކަ ދެއްކުން ފާހަގަ ކޮށްލެވެއެވެ.
އާލިއާއާ ރަންބީރް ލޯބީގެ ގޮތުން ގުޅިގެން އުޅޭތާ އެތައް އަހަރެއް ވެފައިވާ އިރު، މި ދެތަރިން މި އަހަރުގެ ޑިސެންބަރުގައި ކައިވެނި ކުރަން އުޅޭކަމަށް ބުނެ ވެސް ދަނީ ވާހަކަ ދެކެވެމުންނެވެ.
މިކަމާ ބެހޭގޮތުން ރަންބީރްގެ ބޮޑުދައިތަ ރީމާ ޖެއިން ބުނީ އެ ދެމީހުންގެ ކައިވެނި ހިނގަން އުޅޭނަމަ އެކަން މާ ލަސްތަކެއް ނުވެ އެމީހުންގެ ފަރާތުން ވެސް ހާމަވެގެން ދާނެ ކަމަށެވެ.
މިތުންގެ ދަރިއަކަށް ވާން އެކަށީގެން ނުވާކަމަށް ބުނުމުން މީމޯ ރައްދުދީފި
"ނެޕޮޓިޒަމް"ގެ ވާހަކައަކީ ބޮލީވުޑްގައި އެންމެ ގަދަޔަށް ދެކެވޭ އެއް ވާހަކައެވެ. ސްޓާރުންގެ ދަރިންނަށް ބޮޑަށް އިސްކަން ދިނުމުގެ ސަބަބުން ބުރަކޮށް މަސައްކަތް ކުރާ އެކްޓަރުންނަށް ކުރިއަށް ނުދެވޭ ވާހަކައެވެ.
ނަމަވެސް ކޮންމެ މަޝްހޫރު ސްޓާރެއްގެ ދަރިއަކީ ދާއިރާގައި ކާމިޔާބީ ލިބުނު ބައެކޭ ވެސް ބުނެވޭކަށް ނެތެވެ.
އެގޮތުން ފާހަގަ ކޮށްލެވޭ އެކަކީ މިތުން ޗަކްރަބޯޓީގެ ދަރި މީމޯ ޗަކްރަބޯޓީއެވެ.
މިހާރު އެކްޓިންގ ދޫކޮށްލައިފައިވާ މީމޯ ކުޅުނު ފިލްމުތައް ނާކާމިޔާބުވުމުން އޭނާއަށް ވަނީ އެތައް ބައެއްގެ ފާޑު ކިޔުމާ ކުރިމަތިލާން ޖެހިފައެވެ. އެގޮތުން މިތުންގެ ދަރިއަކަށް ވާން އޭނާ އެކަށީގެން ނުވާ ކަމަށް ވެސް ބައެއް މީހުން ބުންޏެވެ.
އެއަށް ރައްދު ދެމުން މީމޯ ބުނީ، އޭނާ އެންމެ ފަހުރުވެރި ވަނީ މިތުންގެ ދަރިއަކަށްވުމުން ކަމަށާއި ނަމަވެސް އޭނާ ހޯދި އެއްވެސް މަސައްކަތެއް ހޯދީ ބައްޕަގެ ނަން ބޭނުން ކޮށްގެން ނޫން ކަމަށެވެ. އެއީ އޭނާގެ ބުރަ މަސައްކަތުން ހޯދި ޕްރޮޖެކްޓުތަކެއް ކަމަށާއި ރަނގަޅު ފުރުސަތު ލިބުނު ނަމަ އޭނާގެ ހުނަރު ވެސް ދެއްކުނީސް ކަމަށް މީމޯ ބުންޏެވެ.
ބައްޕަގެ އެހީތެރިކަން އާހާން ވެސް ބޭނުމެއް ނުވޭ
ސުނީލް ޝެޓީގެ ދަރި އާހާން ޝެޓީ، އޭނާގެ ފުރަތަމަ ފިލްމުން ވެސް ކާމިޔާބީ ހޯދި ނަމަވެސް، ދާއިރާގައި ކުރިއަށް ދާން އޭނާގެ ބައްޕަގެ އެހީތެރިކަން ބޭނުން ނުވާ ކަމަށް ބުނެފިއެވެ.
އާހާން ބުނީ، މަޝްހޫރު މައިންބަފައިންގެ ސަބަބުން ކާމިޔާބީ ލިބޭ ކަމަށް ބުނާ ވާހަކަ ދޮގު ކުރަން އޭނާ ބޭނުންވާ ކަމަށާއި އެހެންކަމުން ދާއިރާގައި ކުރިއަށް ސުނީލްގެ އެހީތެރިކަން ބޭނުން ނުވާ ކަމަށެވެ.
މީގެ އިތުރުން އާހާންގެ ފިލްމެއް ސުނީލް ޕްރޮޑިއުސް ވެސް ނުކުރުމަށް އޭނާ އެދިފައިވެއެވެ.
