ހިޔާނާތްތެރިވާން ޖާގައެއް ނުދޭނަން، އެދެނީ ދައުލަތުގެ ބާރަކުން ނުފޫޒު ނުފޯރުވުމަށް: ސަރުކާރު
އެއްވެސް ވަރަކަށް ހިޔާނާތްތެރިވުމަށް މި ސަރުކާރުން ޖާގަ ނުދޭނެ ކަމަށާއި މައްސަލަތައް ތަހުގީގު ކުރުމުގެ ފުރިހަމަ އިހުތިޔާރު މުއައްސަސާތަކަށް ދީފައިވާ ކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.
އޮންލައިން ނޫހަކަށް މަޢުލޫމާތު ދެއްވަމުން ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވީ މި ސަރުކާރުން ހިޔާނާތްތެރިވުމަށް ޖާގައެއް ނުދޭނެ ކަމަށެވެ. އަދި އެއްވެސް މީހަކާ މެދު ތަފާތުކުރުން ވެސް ނުގެންގުޅޭނެ ކަމަށާއި އެއްވެސް މީހަކަށް އަނިޔާވެރި ނުވާނެ ކަމަށެވެ. އަދި އަނިޔާވެރިވުމަށް ފުރުސަތު ވެސް ނުދޭނެ ކަމަށް ޒާހިރު ވިދާޅުވިއެވެ.
މީގެ އިތުރުން ޒާހިރު ވިދާޅުވީ ކޮންމެ މީހަކާ މެދު ވެސް ހުށަހެޅޭ އަދި ތުހުމަތު ކުރެވޭ މައްސަލައެއް ފުރިހަމައަށް ބަލައި ތަހުގީގު ކުރުމުގެ ފުރިހަމަ އިހުތިޔާރު މުއައްސަސާތަކަށް ދީފައިވާ ކަމަށާއި އެފަދަ ކަމަކަށް ސަރުކާރުން ނުފޫޒެއް ނުފޯރުވާނެ ކަމަށެވެ.
ޒާހިރު ވިދާޅުވީ ސަރުކާރުން އެދެނީ ދައުލަތުގެ އެއްވެސް ބާރަކުން އަދި މުއައްސަސާއަކުން ވެސް އެއްވެސް ފަރާތަކަށް ނުފޫޒު ނުފޯރުވުމަށް ކަމަށް ޒާހިރު ވިދާޅުވިއެވެ.
ޒާހިރު މިފަދައިން ވިދާޅުވެފައި ވަނީ އެމްޑީޕީން އަބަދުވެސް ބޭނުން ވަނީ ވަރަށް އާދައިގެ ކަމެއް ކަމަށާއި އެއީ ސަރުކާރުން ޚިޔާނާތްތެރި ނުވެ، ތަފާތު ކުރުން ނުގެންގުޅެ، އަނިޔާވެރި ނުވުން ކަމަށް، އެމްޑީޕީގެ ރައީސް މުޙައްމަދު ނަޝީދު ވިދާޅުވެފައިވާ ދަނޑިވަޅެއްގައެެވެ.
