އެމްޑީޕީ ނަފްރަތުގެ ރަމްޒަކަށް ހަދަން މަސައްކަތް ކުރާތީ ކަންބޮޑުވޭ: ފައްޔާޒު
ވެރިކަން ކުރާ މައި ޕާޓީ އެމްޑީޕީއަކީ ނަފްރަތުގެ ރަމްޒަކަށް ހަދަން ކުރާ މަސައްކަތަކީ ވަރަށް ދަށު ދަރަޖައިގެ ކަމެއްކަމަށާއި އެކަމާ ކަންބޮޑުވާ ކަމަށް އެމްޑީޕީގެ ޗެއާޕާސަންގެ މަޤާމަށް ވާދަ ކުރައްވާ އިކޮނޮމިކް މިނިސްޓާރ ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވީ އެމްޑީޕީގެ ޗެއާޕާސަން އިންތިޚާބުގެ ކެމްޕެއިނަށް ހދ. ކުޅުދުއްފުއްޓަށް ވަޑައިގެން އެރަށުގެ އެމްޑީޕީ މެމްބަރުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ފައްޔާޒު ވިދާޅުވީ އެމްޑީޕީއަކީ ނަފްރަތުގެ ރަމްޒަކަށް ހަދަން މަސައްކަތް ކުރާތީ އެކަމާ ކަންބޮޑުވާ ކަމަށާއި ކެމްޕެއިން ކުރަން ޖެހޭނީ ނަފްރަތު އުފައްދައިގެން ނޫން ކަމަށާއި ކެމްޕެއިން ކުރަން ވާނީ ރީތިކޮށް ކަމަށް ފައްޔާޒު ވިދާޅުވިއެވެ.
މީގެ އިތުރުން ފައްޔާޒު ވިދާޅުވީ ކެމްޕެއިން ދަތުރުތަކުގައި ރާއްޖޭގެ 145 ރަށަކަށް ދެވިފައިވާ ކަމަށާއި ބެލި ބެލުމުން މަދު ރަށެއް ފިޔަވައި އެއްވެސް ރަށެއްގައި ޕާޓީގެ ހަރަކާތެއް ނުހިނގާ ކަމަށެވެ. ފައްޔާޒު ވިދާޅުވީ ދެބަސްވުންތައް އެއްފަރާތްކޮށް، އެންމެން އެކަތި ގަނޑެެއްގެ ގޮތުގައި މަސައްކަތް ކުރަން ޖެހޭ ކަމަށެވެ.
“އަޅުގަނޑުމެން މި ނިކުތީ ހުއްޓިފައި ހުރި ޖަގަހަތަކާއި ހަރަކާތްތައް ހިންގާލަން. 2023 ބޭނުންވާ ކަމުގައި ވަނީ ނަމަ ހުރި ދެބަސްވުންތައް އެެއްފަރާތްކޮށް އެންމެން އެކަތިގަނޑެެއްގެ ގޮތުގައި މަސައްކަތް ކުރަން ޖެހޭ” ފައްޔާޒު ވިދާޅުވިއެވެ.
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބުގައި ފައްޔާޒާ އެކު ދެން ވާދަކުރައްވަނީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)އެވެ. މި އިންތިހާބު ބޭއްވުމަށް ހަމަޖެހިފައި ވަނީ މި މަހުގެ 14ވަނަ ދުވަހުއެވެ.
Ads by STO
