ރައީސް ޔާމީންގެ ސަލާމަތީ ކަންކަމަށް ސަރުކާރުން ވަނީ އިޙްމާލުވެފައި: އިދިކޮޅު
ކުރީގެ ރައީސް އަބްދުﷲ ޔާމީނުގެ ސަލާމަތާއި ރައްކާތެރިކަމަށް މި ސަރުކާރުން ވަރަށް ބޮޑަށް އިހުމާލުވެފައިވާ ކަމަށް އިދިކޮޅު ކޯލިޝަނުން ވިދާޅުވެއްޖެއެވެ.
އެ ކޯލިޝަނުން މިހެން ވިދާޅުވެފައި ވަނީ، ރައީސް ޔާމީންގެ ގެކޮޅަށް ސްޕްރޭ ޖެހި މައްސަލައެއް ފުލުހުން ތަޙްޤީޤް ކުރަމުންދާ ދަނޑިވަޅެއްގައެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ޔާމީންގެ ގެކޮޅަށް ހަމަލާދެވުނީ އެމްއެންޑީއެފުން ދޭންޖެހޭ ސަމާލުކަން ނުދެވި އަދި ސަރުކާރުން ޔާމީންގެ ސަލާމަތާއި ރައްކާތެރިކަން ކަށަވަރުކޮށް ނުދެވޭތީ ކަމަށެވެ.
"ރައީސް ޔާމީންގެ ގެކޮޅަށް މި ގޮތަށް މި އަމަލު ކުރެވުނީ އެއީ އެމްއެންޑީއެފް ދޭންވާ ސަމާލުކަން ނުދީ އޮތީމަ. ސަރުކާރުން ދޭން ޖެހޭ ސަލާމަތާއި ރައްކާތެރިކަން ކަށަވަރުކޮށް ނުދެވޭތީ އެހާ ހިސާބަށް ދާނީ" އަދުރޭ ވިދާޅުވީ ރައީސް ޔާމީނަށް އިންޒާރުދިން މައްސަލައެއް ވެސް ދައުލަތުގެ ކަމާބެހޭ ފަރާތްތަކަށް ހުށަހެޅި ކަމަށާއި ނަމަވެސް ރަސްމީކޮށް މިހައިތަނަށް އެއްވެސް ޖަވާބެއް ދީފައި ނުވާ ކަމަށެވެ.
"ރައީސް ޔާމީނާ ދޭތެރޭގައި މި ސަރުކާރުން ވަރަށް ބޮޑަށް އިހުމާލުވެއްޖެ. އެ މަނިކުފާނުގެ ސެކިއުރިޓީއަށް އިސްކަމެއް ނުދޭ"
