ރާއްޖެއަށް ހަމަޖެހުން ގެނެސްދޭ އާރުކާޓީންނަކީ އެމްޑީޕީ މެމްބަރުން: ފައްޔާޒް
ރާއްޖެއަށް ހަމަޖެހުމާއި ތަރައްގީ ގެނެސްދޭ އާރުކާޓީންނަކީ އެމްޑީޕީގެ މެމްބަރުން ކަމަށާއި، އަލުން އައު ބާރަކާ އެކު އެމްޑީޕީ ހިންގާލަން ޕާޓީގެ ހުރިހައި މެންބަރުން މާދަމާގެ ވޯޓަށް ނުކުމެ ވޯޓު ދެއްވުމަށް އެ ޕާޓީގެ ޗެއާޕާސަންކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއިލް ގޮވައިލައްވައިފިއެވެ.
ފައްޔާޒު މިރޭ ކުރެއްވި ޓްވީޓެއްގައި ވިދާޅުވީ އެންމެން އެކުވެ ގުޅިގެން ތިބެ ކުރިއެރުން ހޯދައި، ފިތުނައާ ނަފްރަތުން އެކަހެރިވެ، ރާއްޖެއަށް ހަމަޖެހުމާ ތަރައްގީ ގެނެސްދޭ އާރުކާޓީންނަކީ އެމްޑީޕީ މެންބަރުން ކަމަށެވެ.
މާދަމާ އޮންނަ މި އިންތިޚާބުގައި ވާދަކުރާ ދެ ކެނޑިޑޭޓުންގެ ޓީމުން ވެސް ވަނީ ރާއްޖޭގެ ހުރިހައި ރަށަކަށް ދަތުރުކޮށް، ވާދަވެރި ކެމްޕޭނެއް ކުރައްވައިފައެވެ. މި އިންތިހާބުގައި ވޯޓުލުމުގެ ހައްގު 90،000އަށް ވުރެ ގިނަ މެމްބަރުން ލިބިފައިވެއެވެ. މި އިންތިހާބުގެ ވޯޓުލުން ކުރިއަށްދާނީ މާދަމާ ހެނދުނު 9އިން ހަވީރު 4 ޖެހުމާ ހަމައަށެވެ.
