މިއީ ސަރުކާރާ އެކު 2023 ކާމިޔާބުކުރަން ދިން ވޯޓެއް: ފައްޔާޒް
އެމްޑީޕީގެ ޗެއަރޕާސަން ހޮވުމަށް ކުރިއަށް ގެންދިޔަ ވާދަވެރި އިންތިޚާބުގައި އެމްޑީޕީގެ މެންބަރުން ދިން ވޯޓަކީ، ސަރުކާރާ އެކު ކުރިއަށް ގޮސް 2023 ކާމިޔާބުކުރުމަށް ދިން ވޯޓެއްކަމަށް އެމްޑީޕީގެ ޗެއަރޕާސަން އިންތިިޚާބު ކާމިޔާބު ކުރެއްވި އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވެއްޖެއެވެ.
އެމްޑީޕީގެ ޗެއަރޕާސަންގެ އިންތިޚާބު ކާމިޔާބުކުރެއްވިއްޖެކަން ޔަޤީންވުމާ އެކު ސަޕޯޓަރުންނަށް ޝުކުރު އަދާކުރައްވާ ފައްޔާޒު ކުރެއްވި ޓްވީޓްގައި ވަނީ އެމްޑީޕީގެ މެންބަރުން މިއަދު ދިން ވޯޓަކީ މެންބަރުން އެދުނު ގޮތަށް ޕާޓީ ހިންގައިލާ، އެމްޑީޕީއާއި ސަރުކާރާ އެއްކޮށް 2023 ވަނަ އަހަރުގެ ރިޔާސީ އިންތިހާބު ކާމިޔާބުކުރުމަށް ދިން ވޯޓެއް ކަމަށެވެ. ފައްޔާޒު ވަނީ އެކަމުގައި ދެގޮތެއް ނުވެ ހުންނަވާނެކަމަށް ވިދާޅުވެފައެވެ.
“ވޯޓުލަން ނިކުމެ ވޯޓު ދެއްވި ހުރިހާ މެންބަރުންނަށާއި ހިންގާލަން ޓީމަށް ޝުކުރިއްޔާ” ފައްޔާޒު ވިދާޅުވިއެވެ.
އިކޮނޮމިކް މިނިސްޓަރ ފައްޔާޒް އިސްމާޢީލް ވަނީ 28514 ވޯޓް ހޯއްދަވައިފައެވެ. އެއީ ޞައްޙަ ވޯޓްގެ 58 އިންސައްތައެވެ. އިމްތިޔާޒް ފަހުމީއަށް ލިބިވަޑައިގަތީ 42 އިންސައްތަ ކަމަށްވާ 20856 ވޯޓެވެ.
އިއްޔެ ކުރިއަށް ދިޔަ އިންތިހާބުގެ ވަގުތީ ނަތީޖާ ދައްކާ ގޮތުން، އިމްތިޔާޒުގެ މައްޗަށް ފައްޔާޒު ކުރި ހޯއްދެވީ 7،000އަށް ވުރެ ގިނަ ވޯޓުގެ ތަފާތަކުންނެވެ.
މި އިންތިޚާބުގައި އިންތިއަށް ރައީސް ނަޝީދު ތާއީދު ކުރެއްވި އިރު ރައީސް ޞާލިޙް ތާއީދު ކުރެއްވީ ފައްޔާޒަށެވެ.
