"އިންޑިއާ އައުޓް" މުޒާހަރާގެ ތެރެއިން 7 މީހަކު ހައްޔަރަށް
މިރޭ އިދިކޮޅުން ކުރިޔަށް ގެންދިޔަ "އިންޑިއާ އައުޓް" ހަރަކާތުގެ ތެރެއިން ހަތް މީހަކު ފުލުުހުންގެ ހައްޔަރަށް ގެންގޮސްފިއެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ، މިރޭގެ މުޒާހަރާގެ ތެރެއިން ހަތް މީހަކު ހައްޔަރުކޮށްފައިވާ ކަމަށާއި އޭގެ ތެރެއިން ދެ މީހަކަށް އަނިޔާވުމާ ގުޅިގެން ހޮސްޕިޓަލްގައި ފަރުވާ ދެމުންދާ ކަމަށެވެ. ނަމަވެސް އަނިޔާގެ ތަފްސީލެއް ހާމަ ނުކުރައްވައެވެ.
ޕީޕީއެމްގެ އޮފީސް ކުރިމަތީގައްޔާއި މާލޭގެ ބައެއް މަގުތަކުގައި ކުރިއަށް ގެންދިޔަ މުޒާހަރާގައި ފުލުހުންނާއި މުޒާހަރާގެ ބައިވެރީންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ވަނީ ހިނގައިފައެވެ. މުޒާހަރާގެ ތެރެއިން ހައްޔަރު ކުރި މީހުންނާ ގުޅޭ ތަފްސީލެއް ފުލުހުން ނުދެއްވައެވެ.
އިންޑިއާ އައުޓް ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ކަނޑައަޅުއްވައި އެ ހަރަކާތް ހުއްޓުވުމަށް ރައީސް ޞާލިޙް ވަނީ ޤަރާރެއް ނެރުއްވައިފައެވެ. ނަމަވެސް އެ ޤަރާރަކީ ޣައިރުޤާނޫނީ ޤަރާރެއް ކަމަށާއި އެ ހަރަކާތް ނުހުއްޓުވޭނެ ކަމަށް އިދިކޮޅުން ވިދާޅުވެއެވެ.
އިންޑިއާ އައުޓް ހަރަކާތް ހިންގުމުގައި އިސްކޮށް އުޅުއްވާ ބޭފުޅުން ފުލުހުން ދަނީ ހައްޔަރު ކުރަމުންނެވެ. މިގޮތުން ކުރީގެ މަޖިލިސް މެންބަރު މުޙައްމަދު އިސްމާއީލް ވަނީ ހައްޔަރުކޮށްފައެވެ. ނަމަވެސް އޭނާ ދޫކޮށްލަން ކޯޓުން ވަނީ އަމުރުކޮށްފައެވެ.
