ޢިލްމުގެ އެހީގައި މުޖުތަމަޢުގައި ހުރި މައްސަލަތައް ހައްލުކޮށްދެއްވާ: ނައިބު ރައީސް
އުނގެނޭ ޢިލްމުގެ ބޭނުން ހިފައިގެން މުޖުތަމަޢުގައި ހުރި މައްސަލަތައް ހައްލުކުރުމުގެ މަސައްކަތްކޮށްދިނުމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ގޮވައިލައްވައިފިއެވެ.
ރައީސުލްޖުމްހޫރިއްޔާގެ ނައިބު މިކަމަށް ގޮވައިލެއްވީ ދިވެހިރާއްޖޭގެ އިސްލާމީ ޔުނިވަރސިޓީގެ 2022ވަނަ އަހަރުގެ ދަސްވެނިވުމުގެ ޙަފްލާގައި ވާހަކަފުޅު ދައްކަވަމުންނެވެ.
މި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ނައިބު ރައީސް ވިދާޅުވީ ތަޢުލީމު ހާޞިލުކުރުމުގެ އެންމެ ބޮޑު އެއް ބޭނުމަކީ މުޖްތަމަޢުގެ ތެރޭގައި ހަމަޖެހުން ޤާއިމުކޮށްދިނުމަށް އެ ލިބިފައި ހުރި ޢިލްމެއްގެ ބޭނުންހިފައިގެން މުޖްތަމައުގެ އެހެން މީހުންނަށް ރަނގަޅު މަގުތައް ދައްކުވައިދިނުން ކަމަށެވެ. ހަމަ އެހެންމެ އެ މަނިކުފާނު ވަނީ މުޖުތަމަޢުގައި ހުރި ރަނގަޅުކުރަން ޖެހޭ އިޖްތިމާޢީ އެކިއެކި މައްސަލަތަކަށް އަލިއަޅުވައިލައްވައިފައެވެ.
އެގޮތުން މޮޅެތި ޒުވާނުން މަސްތުވާތަކެތީގެ ވަބާގައި ޖެހިގެން ގޮސް ހަލާކުވެގެން ދިޔުމަކީ އެއްވެސް މީހަކު ބޭނުން ވާނެކަމެއް ނޫންކަން ފާހަގަކުރައްވައި ނައިބު ރައީސް ވިދާޅުވީ ތަޢުލީމީ ބަޔަކަށްވެ ތިބެ މިކަމަށް ފުންކޮށް ވިސްނައި މިމައްސަލަ ހައްލުކުރުމަށް ޓަކައި ފަރުދީ ލެވެލްގައި މަސައްކަތްކުރަން ޖެހޭ ކަމަށެވެ. އަދި ކުޑަކުދިންނަށް ކުރާ އެކިކަހަލަ އަނިޔާތައް ހުއްޓުވުމަށް ޓަކައި މިހާރަށް ވުރެ ބޮޑަށް ހޭލުންތެރިވެ އެންމެން އެކީ އެކަމާ ދެކޮޅަށް އަޑު އުފުލައި ހުއްޓުވުމަށް އެ މަނިކުފާނު ގޮވައިލެއްވިއެވެ.
މީގެ އިތުރުން އެމަނިކުފާނު ވަނީ މީހުން ބިނާކުރުމަކީ ސަރުކާރުން އެންމެ އިސްކަން ދެއްވާ އެއްދާއިރާކަން ފާހަގަކުރައްވައި މިހާރު މަތީ ތަޢުލީމު ހާޞިލުކުރުމަށް މުޅި ރާއްޖޭގައި މީގެ ކުރިން ނެތް މިންވަރަށް ފުރުޞަތުތައް ހުޅުވައިލެވިފައި އޮތްކަން ފާހަގަކުރައްވައިފައެވެ.
ދިވެހިރާއްޖޭގެ އިސްލާމީ ޔުނިވަރސިޓީގެ ދަސްވެނިވުމުގެ ރަސްމިއްޔާތުގައި، ކުއްލިއްޔާ އޮފް އެޑިއުކޭޝަންއިން ބެޗްލަރ އޮފް ޓީޗިންގ ޤުރްއާނާއި މާސްޓަރ އޮފް ޓީޗިންގ އެންޑް ލާރނިންގއިން ދަސްވެނިވެ ދަރަޖަ ޙާޞިލުކުރި ދަރިވަރުންނަށް ސަނަދު ޙަވާލުކޮށްދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ.
Ads by STO
