މިޞްރުން ވެސް އިންޑިއާގެ ގޮވާމާ ދިމާއަށް
ރަޝިޔާއިން ޔޫކްރެއިނަށް އަރައި ފަށައިފައިވާ ހަނގުރާމައާ ގުޅިގެން ޔޫކްރެއިނުގައި ހައްދާ ގޮވާމުގެ ބާވަތްތައް އެކްސްޕޯޓް ކުރުން ހުއްޓުމަކަށް އައުމުގެ ސަބަބުން އިންޑިޔާއިން ގޮވާމުގެ ބާވަތްތައް ހޯދުމަށް މިޞްރުން މަސައްކަތް ފަށައިފިއެވެ.
މިޞްރުގެ ސަޕްލައިއާ ބެހޭ ވަޒީރު ޢަލީ މޫސަލްޙީ ވިދާޅުވީ، އިންޑިޔާއިން 180,000 ޓަނުގެ ގޮވާން ގަތުމަށް މިހާރު އެއްބަސްވުމަކަށް އާދެވިފައިވާ ކަމުގައެވެ.
މިޞްރަކީ، ގޮވާމުގެ ބާވަތްތައް އެންމެ ގިނަ އަދަދަކަށް އިމްޕޯޓުކުރާ އެއް ޤައުމެވެ. އެ ޤައުމުން މީގެ ކުރިން ގޮވާމުގެ ބާވަތްތައް ގަންނަމުން ދިޔައީ ރަޝިޔާއާއި ޔޫކްރެއިނުންނެވެ. ނަމަވެސް، ރަޝިޔާ-ޔޫކްރެއިން ހަނގުރާމައާ ގުޅިގެން ބާޒާރުން ގޮވާމުގެ ބާވަތްތައް ލިބުމަށް ދަތިވުމާ ގުޅިގެން މިޞްރުން ވަނީ ގޮވާން ހައްދާ އެހެން މާކެޓުތައް ހޯދަން ފަށައިފައެވެ.
ރަޝިޔާ-ޔޫކްރެއިން ހަނގުރާމައާ ގުޅިގެން މިޞްރަށް ވަނީ މާލީ ގޮތުން ވެސް ދަތިތަކަކާ ކުރިމަތިލާން ޖެހިފައެވެ. ސަބަބަކީ، 70 މިލިޔަން މީހުންގެ އާބާދީއެއް އޮންނަ މިޞްރުގައި ގޮވާމުގެ ބާވަތްތައް ވިއްކާ އަގު ސަބްސިޑައިޒް ކޮށްފައި އޮތުމެވެ. މިޞްރުގައި މި ވަގުތު ރައްކާކޮށްފައި ހުރި ގޮވާމުގެ ސްޓޮކް ކުރިއަށް އޮތް ފަސް މަސް ދުވަހުގެ ތެރޭގައި ހުސްވާނެ ކަމަށް އެ ޤައުމުން ބުނެއެވެ.
މިޞްރާއި އިންޑިޔާއާ ދެމެދު ހަދައިފައިވާ އެއްބަސްވުމުގެ ދަށުން 500,000 ޓަނުގެ ގޮވާން ގަތުމަށް މިޞްރުން ވަނީ އެއްބަސްވެފައެވެ. ނަމަވެސް، މޭ މަހުން ފެށިގެން ގޮވާމުގެ ބާވަތްތައް އެކްސްޕޯޓުކުރުން އިންޑިޔާއިން ހުއްޓައިލުމާ ގުޅިގެން މި އަދަދު މި ވަނީ ދަށްކޮށްފައެވެ. މި ވަގުތު އިންޑިޔާއިން ގޮވާމުގެ ބާވަތްތައް ފޯރުކޮށްދެނީ ކާބޯތަކެތީގެ ރައްކާތެރިކަން ކަށަވަރު ކޮށްދިނުމަށް ދަތިވެފައިވާ ޤައުމުތަކަށް އެކަންޏެވެ.
Ads by STO
