ބެއިރޫތު ހާދިސާ: ބާރުގަަދަ ގޮވުމާއެކު ބައެއް މީހުން ޖައްވަށް ބުރައިގެން ދިޔަ
ލުބުނާނުގެ ވެރިރަށް ބައިރޫތުގެ މައި ބަނދަރާ ކައިރި ހިސާބެއްގައި ގޮވި ގޮވުންތަކާއި ގުޅިގެން މިހާތަނަށް 78 ވުރެ ގިނަ މީހުން މަރުވެ 4000 ވުރެ ގިނަ މީހުން ޒަހަމްވެފައިވާއިރު، މި ހާދިސާގެ ވީޑިއޯ ތަކާއި މަންޒަރުތައް ދަނީ އާންމުވަމުންނެވެ. އަދި ގިނަ ބަޔަކު އަންނަނީ އެމީހުންގެ ތަޖުރިބާ ވެސް ހިއްސާކުރަމުންނެވެ.
އެގޮތުން ލުބުނާނުގެ ޓީވީ ޗެނަލް އެއްގައި މަސައްކަތް ކުރާ ޕްރޮޑިއުސަރެއް ކަމަށްވާ އަހުމަދު ޔާސީން ބުނި ގޮތުގައި ގޮވުން ހިނގި ވަގުތު ބައެއް މީހުން ޖައްވަށް ބުރައިގެން ދިޔަ މަންޒަރު ފެނުނު ކަމަށެވެ.
" އަހަރެންގެ ކާރު ވެސް ދިޔައީ މައްޗަށް އަރައިގެން. މީހުންތައް ޖައްވަށް ބުރައިގެން ދިޔަ މަންޒަރު ފެނުނު. އިމާރާތްތަކާއި ގެތަކާއި ހުރިހާ ތަނެއް ބިމާ ހަމަވި. މީހުން ތައް ރޮއެ ހަޅޭ ލަވާ މަންޒަރު ފެނުނު" ޔާސީން ބުނެފައިވެއެވެ.
މީހުންތައް ޖައްވަށް ބުރައިގެން ދާ މަންޒަރު ފެންނަ ވީޑިއޯ ވެސް ދަނީ މީސް މީޑިއާގައި ދައުރުވަމުންނެވެ.
ބައިރޫތުގައި ގޮވީ ކޮން އެއްޗެއްކަމެއް ސީދާ އަދި ދެނެގަނެވިފައި ނުވާއިރު، ކަމާބެހޭ ފަރާތްތަކުން ބުނާ ގޮތުގައި އެތަނުގައި ގޮވާފައި ވަނީ ވަރަށް ފަސޭހައިން ގޮވާ ކެމިކަލްގެ ބާވަތެއް ކަމަށްވާ އެމޯނިއަމް ނައިޓްރޭޓެވެ. އެއީ ދަނޑުވެރިކަމުގައި ގަސްކާނާގެ ގޮތުގައްޔާއި ބޮންތަކުގައި ބޭނުންކުރާ އެއްޗެކެވެ. ގޮވި ގުދަނުގައި މީގެ 2،700 ޓަނުގެ ކެމިކަލް ހުރި ކަމަށްވެއެވެ.
ސައިންސްވެރިން ބުނާ ގޮތުގައި އެމޯނިއަމް ނައިޓްރޭޓަކީ އެހާ ފަސޭހައިން އަމިއްލަ ޒާތުގައި ގޮވާ އެއްޗެއް ނޫން ނަމަވެސް އެއީ އެއްޗެއްގައި ރޯވުމަށް ބޭނުންވާ އޮކްސިޖަން ފަސޭހައިން ފޯރުކޮށްދިނުމަށް އެހީވާ މާއްދާއެކެވެ.
ނަމަވެސް އެމޯނިއަމް ނައިޓްރޭޓަށް ތެލުގެ އަސަރުކުރުން ފަދަ ކަމެއް ދިމާވެގެން އެއީ ގަދަޔަށް އަލިފާން ހިފާ އެއްޗަކަށް ބަދަލުވެދާނެ ކަމަށާއި ބެއިރޫތުގައި ހިނގީ މިފަދަ ހާދިސާއެއް ކަމަށް ސައިންސްވެރިން ބުނެއެވެ.
ލުބުނާނުގެ އޮފިޝަލުން ބުނާ ގޮތުގައި މި ހާދިސާގައި މަރުވި މީހުންގެ އަދަދު އިތުރުވާނެކަމަށް ބެލެވެއެވެ. މީހުން ސަލާމަތްކުރުމުގައި ހަރަކާތްތެރިވާ ޓީމްތައް އަންނަނީ ވެއްޓިފައިވާ އިމާރާތްތައް ނަގާ އެތަނުގެ ދަށުގައި އެއްވެސް މީހަކު ވޭތޯ ބަލަމުންނެވެ. އަދި ބައިރޫތުގެ ހޮސްޕިޓަލްތައް ފުރުމުން ޒަހަމްވި މީހުންނަށް ފަރުވާދިނުމަށް ސިޓީން ބޭރަށް ގެންދާ ކަމަށް ވެސް އޮފިޝަލުން ބުނެއެވެ.
ހަބަރުތައް ބުނާ ގޮތުން ބައިރޫތުގައި ބާރުގަދަ އެއްޗެއް ގޮވާފައި މިވަނީ އެގައުމުގެ ކުރީގެ ބޮޑުވަޒީރު ރަފީޤު ހަރީރީ އަވަހާރަކޮށްލި މައްސަލާގައި ހުކުމް އިއްވަން ތައްޔާރު ވެފައިވަނިކޮށެވެ.
ބައިރޫތްގައި މި ގޮއްވި ގޮވުންތަކީ ފަހުގެ ތާރީހެއްގައި އެ ޤައުމުގައި ގޮވި އެންމެ ބާރު ގަދަ ގޮވުންތަކެވެ. މި ގޮވުންތަކުގެ އަޑު އެޤައުމާއި 150 މޭލު ދުރުގައި އޮންނަ ސައިފްރަސްއާއި ހަމައަށް އިވުނުކަމަށް ހަބަރުތައް ބުނެއެވެ.
omy god