ޚަރަދުތައް ހަމަޖައްސަން ޕާކިސްތާނުގައި މިނިކާވަގު ވިއްކަނީ
ޕާކިސްތާނުގައި މިހާރު ދިމާވެފައިވާ އިޤްތިޞާދީ ދަތިކަމުގެ ސަބަބުން ދިމާވެފައިވާ ޚަރަދުތައް ހަމަނުޖެއްސިގެން މިނިކާވަގު ވިއްކަން އެ ޤައުމުގެ ޒޫއަކުން ނިންމައިފިއެވެ.
އެ ޤަައުމުގެ ވެރިރަށް ލާހޯރުގައި ހުންނަ މި ޒޫއިން މިނިކާވަގު ވިއްކުމަށް ނިންމާފައިވާ އެންމެ ކުޑަ އަގަކީ 670 ޑޮލަރަށެވެ. އެއީ ގާތްގަނޑަކަށް ދިހާ ރުފިޔަލެވެ.
އެ ޒޫއިން ވަނީ އެތަނުގައި މިވަގުތު ތިބި 29 މިނިކާވަގުގެ ތެރެއިން 12 މިނިކާވަގު ވިއްކާލަން ނިންމާފައިވާކަން ހާމަކޮށްފައެވެ. މިނިކާވަގު ވިއްކުމަށް ހަމަޖެހިފައިވަނީ އެންމެ ބޮޑު އަގު ހުށަހަޅާ ފަރާތަކަށް ބީލަންގެ އުސޫލުންނެވެ. މާދަމާ މި ބީލަން އޮންނާނެއެވެ. މި ބީލަމުގައި ބައިވެރިވެވޭ ފަރާތްތަކުގެ ތަފްސީލް އަދިހާމަކޮށްފައެއް ނުވެއެވެ. ނަމަވެސް ބައިވެރިވެވޭނީ މިފަދަ ކަންކަމުގައި އާއްމުކޮށް އުޅޭ ކުންފުނިތަކަށް ކަމަށް ލަފާ ކުރެވެެއެވެ.
މި ޒޫއިން މިނިކާވަގުތައް ވިއްކާލަން ނިންމާފައިވަނީ އެ ތަނުގައި ގެންގުޅެވޭ ވަރަށް ވުރެ ގިނައިން އެ ޖަނަވާރުތައް ހުރުމުންނެވެ. ޒޫގެ ކެޕޭސިޓީއަކީ 20 މިނިކާވަގެވެ. ގިނައިން ގެންގުޅޭނަމަ އެހެން ޖަނަވާރުންނަށް އުދަނގޫވެއެވެ. އަދި ޒޫ ބޮޑު ކުރަން ޚަރަދު. ކުރަން ފައިސާ ނެތް ކަމަށް ޒޫގެ ވެރި ފަރާތުން ހާމަކުރެއެވެ.
