މިހާތަނަށް 93 ފުލުހަކާއި ސްޓާފަކު ކޮވިޑަށް ފައްސިވެފައިވޭ: ސީޕީ
މިހާތަނަށް 93 ފުލުހަކާއި ސްޓާފަކު ކޮވިޑް-19 އަށް ފައްސިވެފައިވާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ޕޮލިސް ކޮމިޝަނަރު ހަމީދު ކުރެއްވި ޓްވީޓެއްގައި ވިދާޅުވީ ފުލުހުންގެ ތެރެއިން ކޮވިޑް-19 އަށް ފައްސިވި މީހުންގެ ތެރޭގައި އޮފިސަރުންނާއި މުވައްޒަފުން ހިމެނޭ ކަމަށެވެ.
އޭގެ ތެރެއިން 56 މީހަކަށް އަދިވެސް ފަރުވާދެމުންދާ ކަމަށް އޭނާ ވިދާޅުވިއެވެ.
ސީޕީ ވިދާޅުވީ ރާއްޖޭގައި ހަލުވިކަމާ އެކު، ކޮވިޑް-19 ފެތުރެމުންދާތީ ބަލި ކޮންޓްރޯލް ކުރަން އަޅަމުންދާ ފިޔަވަޅުތަކާ އެކުގައި ފުލުހުންގެ ލީޑަޝިޕާއި ވަސީލަތްތަކާއި އެހީތެރިކަން ގައުމަށް ލިބިގެންދާނެ ކަމަށެވެ.
ފުލުހުންނެކޭ އެއްގޮތަށް ފްރަންޓްލައިންގައި މަސައްކަތް ކުރާ މީހުންގެ ތެރެއިން ގިނަ އަދަދެއްގެ ބަޔަކު މިހާތަނަށް ކޮވިޑް-19 އަށް ފައްސިވެފައިވާ ކަމަށް ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ) އިން ވަނީ ހާމަކޮށްފައެވެ. އަދި ފަހަކަށް އައިސް، ކުރީ ސަފުގައި މަސައްކަތް ކުރާ މީހުން ފައްސިވާ މިންވަރު އިތުރުވަމުން އަންނަ ކަމަށް ވެސް އެ ސެންޓަރުން ވަނީ ބުނެފައެވެ.
