ކުރިއަށް 6 މަހު ވަރަށް ދަތިވާނެ، ޖީޑީޕީ މައިނަސް 11 ޕަސެންޓަށް ދަށްވާނެ: ފައްޔާޒު
ކުރިއަށް އޮތް ހަ މަސް ވަރަށް ދަތިވާނެ ކަމަށާއި ޖީޑީޕީ 11 ޕަސެންޓަށް ވެއްޓޭނެ ކަމަށް އަންދާޒާ ކުރެވޭ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
ޕީއެސްއެމްގެ ރާއްޖެ މިއަދު ޕްރޮގްރާމުގައި ރޭ ވާހަކަ ދައްކަވަމުން މިނިސްޓަރު ވިދާޅުވީ ރާއްޖޭގެ އިގްތިސޯދު މިހާރު މި އޮތީ ވަރަށް އުނދަގޫ ހާލަތަކަށް ގޮސްފައި ކަމަށާއި މީގެ ކުރިން ރާއްޖޭގެ ޖީޑީޕީ މިދިޔަ އަހަރާ އަލާބަލާ އިރު 7.5 ޕަސެންޓު ކުރި އަރާނެެ ކަމަށް ލަފާކުރި ނަމަވެސް ކޮވިޑް-19 އާއެކު ދިމާވެފައިވާ ދަތިތަކާ އެކު އިގްތިސޯދު ހުއްޓިފައިވާ ކަމަށް މިނިސްޓަރު ވިދާޅުވި އެވެ.
އެގޮތުން ޖީޑީޕީ މައިނަސް 11 ޕަސެންޓް ދަށްވާނެ ކަމަށް ލަފާކުރެވޭ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ 2019 ގައި ރާއްޖޭގެ އިގްތިސޯދު އޮތް ހާލަތަށް އަނބުރާ ދެވޭނެ ކަމަށް ލަފާ ކުރެވެނީ 2022 ގައި ކަމަށެވެ.
ފައްޔާޒު ވިދާޅުވީ ދުރު ރާސްތާއަކަށް ވިސްނައިފިނަމަ އާ ވިސްނުންތަކަކާއެކު އިޤްތިޞާދު އަނެއްކާވެސް ކުރިއެރުވުމަށް މަސައްކަތްތަކެއް ކުރެވޭނެ ކަމަށެވެ. އެގޮތުން ސަރުކާރުގެ އެންމެ ބޮޑު އަމާޒަކީ އިޤްތިޞާދު ޑައިވާސިފައި ނުވަތަ އިޤްތިޞާދު މިހާރަށްވުރެ ފުޅާކޮށް، ފަތުރުވެރިކަމަށް ބަރޯސާވާ މިންވަރު ކުޑަކުރުންކަމަށް މިނިސްޓަރ ވިދާޅުވިއެވެ.
"ޓޫރިޒަމަށް ބަރޯސާވާ މިންވަރު ދަށްކޮށް އެހެން އިތުރު ސިނާއަތްތައް ފުޅާކުރުމުން ދުރު ރާސްތާގައި ރާއްޖެއަށް ބޮޑެތި ފައިދާތަކެއްކުރާނެ. ރައީސް އުފައްދާފައިވާ ނެޝަނަލް ޓާސްކް ފޯސް އޮން އިކޮނޮމިކް ރިސެލިއަންސްއިން ވެސް ދަނީ މިކަމަށް މަސައްކަތްތަކެއް ކުރަމުން" މިނިސްޓަރު ވިދާޅުވިއެވެ.
މިނިސްޓަރު ފައްޔާޒް ވިދާޅުވީ އިޤްތިޞާދު ހަމައަކަށް އެޅުވުމަށް ސަރުކާރުން ކުރާ މަސައްކަތުގެ ދަށުން، އިޤްތިޞާދު ފުޅާކުރުމާއެކު، ޚާއްސަ ކަންތައްތަކަކަށް އިސްކަން ދެއްވައިގެން މަސައްކަތްތަކެއް ކުރައްވަމުން ގެންދަވާކަމަށެވެ.
Ads by STO
